Shillong, Risaw : Ka Seng Hynñiewtrep Youths’ Council (HYC) Seng Kmie ha ka 22 tarik mynta u bnai kala ïoh ban pynskhem ïa ki dkhot bathymmai jong ka HYC Sohïong Circle na bynta ka samoi treikam jong u snem 2022-2025.
Ha kane ka sngi la ïoh ka jingkren na ki dkhot jong ka Seng Kmie kiba kynthup ïa u Samla Rangbah Joplang Kharnaïor (Assistant General Secretary) bad u Samla Rangbah Donbok Kharlyngdoh (Vice President). Ki nongkren ha kane ka sngi kila ai khublei ïa ka Circle kaba ka leh shibun bah ki kam ba khraw kiba long ka jingmyntoi ïa ka dong ka thaiñ bad ïa ka Jaitbynriew hi baroh kawei.
Ki nongkren ki la ban jur ruh halor ka nongrim jong ka HYC ba ka ïeng na ka bynta ban ïakhun borbah na ka bynta ki daw bah jong ka Jaitbynriew Hynñiewtrep kaba dei ka Jaitbynriew rit paid.
U Samla Rangbah Donbok Kharlyngdoh uba dei ha ka juh ka por u Vice-President jong ka Seng Kmie ula ong ba ki bun ki Jaitbynriew rit paid ha ka pyrthei kila duh jait noh na ka jingshah tyllep ha ki Jaitbynriew heh paid. Kumta donkam ïa ka Jaitbynriew jong ngi ba kan khih na ka bynta ban ïada ïala ka jong ka Jaitbynriew khnang ba kan ym shah tyllep ha kiwei ki Jaitbynriew heh paid.
La ïoh ruh ka jingkren na u President jong ka HYC Sohïong Circle, Samla Purningstar Shabong ha kaba ula ong ba ha kane ka EC kaba ka dep kala leh shibun bha ki kam. Hapdeng ka jing ïaid lynti jong ka Seng, ka la hap ban ïaid lyngba ki at ki thep, ki raieh raidam, kala hap ban ïaid ïa ka lynti ka jing shah kynthoh kiba bun.
Watla katta ula ong ba kum ki nongïalam ka Circle ki sngewthuh ba kim shym la leh na ka bynta ka jingbha jongno jongno, hynrei ka leh na ka bynta ka jingbha jong ka Jaitbynriew hi baroh kawei. Ula buh ka jingkyrmen ba nangne sha khmat ka Seng kan sa dang kham treibha shuh shuh ban ïai bud dien halor ki mat kiba long ki jingmyntoi na ka bynta ka imlang sahlang, ka dong ka thaiñ bad ka Jaitbynriew hi baroh kawei.
La pynïaid ïa kane ka jingpynskhem da u Organising Secretary HYC Seng Kmie, Samla Rangbah John Lyngdoh.Ki dkhot ba thymmai ba la jied ha katei ka sngi ki kynthup ïa u President: Purningstar Shabong, Vice-President i/c Finance Kampar Shabong,Vice-President Administration Kynsaijune Kharhunai, General Secretary Hamar bamut Thabah, Asst Secretary Dhotdingstar Nongbri, Assistant Secy Ïaidbor Jana, Sport Secy Govanwell Malngiang, Environment Secy Rambor Nongbri, Education Joinsngi Shabong, Socio & Cultural Diber Shabong, Publicity Banjied Kharjann bad Organising Secy Livingstone Paliar kynthup ia ki Executive Members.
