Pynkhreh elekshon MLA ka Eastern West Khasi, lum ïa ki Sordar bad BLO

Mairang, Risaw 20: Ka ophis jong u DC (Election) Eastern West Khasi Hills District mynta ka sngi, ka la pynlong ïa ka jingïalang bad ki, ki Sordar, ki Booth Level Officer, ki Supervisor bad kiwei kiwei ki ophisar ba dei pynïaid ïa ka elekshon na ka bynta ban ïakren ha kaba ïadei bad ka jingpynkhreh ïa ka elekshon MLA ha u 2023.
Ha kane ka jingïalang ba la pynïaid da u DC Eastern West Khasi Hills, u Bah W. Nongsiej, la ïadon lang ruh u Bah A. Nongbri, ADC uba long u Election Officer ka District bad ki Sordar kiba hap ha Mawthadraishan Constituency, ki BLO bad kiwei kiwei de kiba dei peit bad pynïaid ïa ki kam elekshon.
Kane ka jingïalang ka la ïakren kham bniah ha kaba ïadei bad ka jingpynrung kyrteng thymmai ïa ki nongthep vote kiba la palat 18 snem. Nangta ka jingpynbeit ïa ki kyrteng kiba bakla, ka jingweng noh ïa ki kyrteng thep vote kiba la leit sah noh shawei bad khamtam eh ka jingpynïasnoh ïa ka EPIC bad u Aadhaar Number.
U DC u la ïathuh ba ka Mawthadraishan ka la mih tam sa 7 tylli ki Polling Station thymmai bad ka jingdon ki nongthep vote haduh mynta ka long palat 41 hajar ngut. Kumta ka sorkar kan hap ban shim khambun ki briew khamtam ki nongtrei sorkar ban pynïaid ïa kine ki jingdonkam ha kylleng kylleng ki Polling Station khamtam ha kaba pynrung kyrteng bad pynïasnoh ïa ka EPIC bad u Aadhaar Numberkaba dei ka jingbthah da ka Election Commission jong ka ri India.
U DC u la ïathuh ba ha kaba ïadei bad ka jingpynïasnoh ïa ka EPIC bad u Aadhaar Number, ka Eastern West Khasi Hills kadei kaba sha trai duh. Ha kane ka District na ki artylli ki Constituency, kata ka Mairang bad ka Mawthadraishan ka Mairang lei lei ka dang kham duna shuh shuh.
U la ïathuh ba haduh mynta ka Election Commission kam pat ong ba ka jingpynïasnoh ïa ka EPIC bad u Aadhaar Number ba hap ban leh beit ym lah ban kiar, hynrei ym tip pat hadien kaei kaba kan bthah. “Lada jia ba kan bthah ba dei beit ban pynïasnoh ïa ka EPIC bad u Aadhaar,kaba mut kiba bun ki briew kin duh thep vote”, u la ong, da kaba bynrap pat ba na ka liang ka tnad Election ka la buh ki sngi bad ki por ba kyrpang ha ki Shnong ba ki paidbah nongthep vote kin leit pynïasoh ïa ka EPIC bad u Aadhaar lane da kiwei kiwei pat ki kot donkam, kum ki Passbook, ki Driving License, ki Card Ration.
U Bah Nongbri, u la ïathuh ba nalor ki tarik ba la buh ba ki BLO kin shong kyrpang ha ki Polling Station, ki paidbah nongthep vote ki lah ruh ban leit ïakynduh hi ha ki jaka ba ki trei, kum ha ki skul bad kiwei kiwei ki jaka. Nalorkata u la ong ruh ba dei ban peit ba ki kyrteng thep vote kidei ban don ha ka Electoral Roll, namar don ki briew kiba la don ki EPIC, hynrei kim don kyrteng pat ha ka Electoral Roll. Kiba kum kine ki briew kin nym ïoh thep vote satia.
U la kyntu ïa ki Sordar bad ki BLO ban ïatreilang na ka bynta kane ka kam, khamtam haba ki BLO ki rung sha ki Shnong ki thw ne sha ki ïing ki sem na ka bynta ka jingpynïasnoh ïa ka EPIC bad u Aadhaar.
Ha kane ka jingïalang kiba bun ki Sordar bad ki BLO ki la pynpaw ïa ka jingeh ban pynïasoh ïa ka EPIC bad u Aadhaar, namar ba bun ki briew kim pat don Aadhaar. Nangta ki don ruh kiba la pynpaw ba ki don ki briew kiba ladep thep shon Aadhaar lah slem, hynrei haduh mynta ruh kim pat ïoh satia ïa ka Card. Nangta ki don ruh ki bym treh satia ban shon Aadhaar bad wat ban shon dur EPIC ruh.
Halor kane ka bynta u DC u la pynshai ba kum ki nongtrei Sorkar bad kum ki Nongsynshar Shnong dei ban ïai pynshai bad pynsngewthuh ïa kito ki bym treh shon Aadhaar ne EPIC ruh, namar ba kan long ka jingduh jingmyntoi kaba khraw ïa kito ki bym don Aadhaar ne EPIC ruh.