Shillong: U president ka BJP Meghalaya State Unit u Bah Ernest Mawrie u la ong ba ka jingwanrah ïa ka Prime Minister’s Development Initiative for North East Region (PM-DevINE) scheme kan long ka jingmyntoi ïa ka jylla Meghalaya.
Ka party ka pdiang da ka jingkmen namar lyngba kane ka skhim ka jingbei pisa ïa ki jylla ka thaiñ Shatei Lammihngi kan long beit 100% na ka Sorkar Pdeng bad ïa mynta la mang T.6,600/- klur ban pynlut ha kine ki saw snem ban dang wan.
U Bah Ernest la ong ba ka Meghalaya kan ïoh ïa ka jingmyntoi kaba bun lyngba kane ka skhim. U la ong ba ka jingphai khmat ka Sorkar Pdeng sha kane ka thaiñ Shatei Lammihngi ka long hadien ba u Narendra Modi u la wan ha ka bor kum u Myntri Rangbahduh ha u snem 2014 da ka jingwanrah ïa kane ka skhim kan wanrah ïa ka jingkylla.
