Shillong, Risaw, 11: Da ki spah ngut ki paidbah najan bad najngai ha ka sngi Baar ki la leit sngewlem ïa ki bahaïng hasem, ïa ki khun ki kti bad ïa ka kurim u Bah Tiklu Jyrwa ka Kong Indalin Lyngdoh Marshyllong ha ka sngi leit ontep ïa ka met ba dang sah jong u Bah Tiklu Jyrwa u nongkiew lum uba la khlad noh ha ka jingtwa u lum thah Draupada ka Dandi, Uttarakhand ha ka 4 tarik mynta u bnai.
Shwa ban rah ïa ka met sha u lum jingtep jong ka Balang Presbyterian Lumparing, la pynlong ïa ka jinglehniam da ka Balang Prebyterian Lumparing bad ka jingleh burom khatduh ïa ka met jong u Bah Tiklu Jyrwa da ki bahaing hasem, ki paralok bad ki dkhot jong ka Meghalaya Sports Climbing and Mountaineering Association (MeSCMA).
Haba kren ha kane ka sngi na ka liang ki paralok nongkiew lum lang bad u Bah Tiklu ki la ïathuh ba u dei u briew uba shisur bad uba ieid ïa ka kam kaba u leh bad uba don ruh ka thong ha kino kino ki kam kiba u leh khamtam eh ha kane ka jaidkam ïalehkai.
U Mama jong u pat haba ai jingkren na ka liang ka ïing u la ïathuh ba une u pyrsa jong u u dei u samla uba baroh ka shnong ka ieid bad ubym ju don kano kano ka dak sniew ha ka imlang sahlang hi.
“Hooid ha ki sngi ba u dang kham rit ka rta umdei uba kit khia ïa ki kam balang bad ïingmane hynrei ynda u la san ka jingïadei jong u bad u Blei ruh ka nangkhlaiñ bad haduh ki sngi ba un khlad noh ruh u dei u samla uba ieid ïa ki kam u Blei bad uba pyrshang ban leh ïa ka mon jong u” u la ong.
Ha kane ka sngi na ka liang ka MeSCMA ka la ai khublei khatduh ïa u Bah Tiklu da kaba ka pyntap ïa ka synduk jong u da ka lama jong ka seng.
Da kane ka jingkhladnoh, u Bah Tiklu u la iehnoh shadien arngut ki khun kiba dang rit, kata, iwei i shynrang bad iwei i kynthei.
Kum ban shu pynkynmaw hangne, ka kynhun ba 29 ngut ki nongkiew lum bad hynñiew ngut ki nongai jinghikai lane ki Mountaineering Instructor jong ka Nehru Institute of mountaineering (NIM) Uttarkashi District, Uttarakhand ki la shah tep im na ka jingtwa jong u lum thah katba ki dang wan phai na ka jingleit kiew ïa u lum Draupada ka Dandi ha ka 4 tarik mynta u bnai ha ka por 8:45 baje mynstep.
U Bah Tiklu uba dei u dkhot jong ka Meghalaya Sports Climbing and Mountaineering Association (MeSCMA) u la leit ïashim bynta ha kane ka jingshah hikai kiew lum da ka jingbei pisa jong ka Directorate of Sports and Youth Affairs lyngba ka MeSCMA.
Ïa ki nongleit kiew lum kiba la ïap ha kane ka jingjia, la ïoh sei da ka kynhun ai jingïarap jong ka State Disaster Response Force lem bad ki shipai suiñ Indian Air Force ha kaba ki la pynpoi ïa ka met jong kiba la khladnoh sha ki bahaïing hasem na ka bynta ban pyndep ïa ka jinglehniam kaba khatduh.
Ki bahaïing hasem jong u Bah Tiklu Jyrwa ki la pynpaw ruh ïa ka jingsngewnguh bad ka jingai khublei ïa ka Sorkar Meghalaya kaba la ai jingïarap ban pynpoi biang ïa ka met jong u Bah Tiklu Jyrwa sha la ïing.
