Ka UDP kam shym la dawa hiar shuki ïa u HM, ka dawa ban pynshitom ïa ki Pulit kawang tear gas

Shillong, Risaw 11: Ka United Democratic Party(UDP) ka la dawa na u Myntri ki Kam Poh Ïing ka jylla u Bah Lahkmen Rymbui ba un shim ki sienjam ban ai jingpynshitom ïa kito kiba don kti ban kawang bom pynsat khmat ïa ki nonghikai kontrak kiba tur sha Secretariat bad kumjuh na ka liang jong ka ka la kyntait ba ka don ka jingdawa hiar shuki noh ïa u Bah Lahkmen na ka shuki myntri.
Ha ka jingïakren sha ki lad pathai khubor, u President ka UDP East Khasi Hills u Bah Titosstarwell Chyne u la ïathuh ba ha ka jingïalang ka Special Core Committee jong ka party kaba la wan shim bynta da baroh ki MLA jong ka party ha ka jingïalang ba la pynlong ha ka sngi Nyngkong ki la ïakren sani bha halor kane ka mat.
“Kum ki nongïalam jong ka party, ngi la bthah ïa u myntri ka tnat ki kam poh ïing ba un pynshitom ïa kito kiba don kti ban kawang bom pynsat khmat pyrshah ïa ki nonghikai kiba ïakhih namar kaei kaba la jia ha kato ka sngi ka ktah lang ïa ki kynthei bad ki khunlung khynnah. Na ka liang jong u Bah Lahkmen u la ïathuh ba u la pan kaiphot halor kane bad ynda la ïoh ïa ka kaiphot na ka liang jong u un sa shim ïa ki sienjam, namarkata, ngi la rai ban ap shuwa tad haduh ba u myntri un ïoh ïa kata ka kaiphot” ong u Bah Titos
Haba kylli la ka don ne em ka shithi ba la phah sha ki nongïalam ka party kaba dawa ba dei ban weng noh ïa u Bah Lahkmen na ka shuki myntri, U Bah Titos u la ïathuh ba na ka liang ki nongïalam kim shym la ïoh kano kano ka shiti ban dawa weng noh na ka shuki myntri ba peit ïa ki kam poh ïing ïa u Bah Lahkmen.
“Ha ka jingshisha ïa kane ka mat ngim shym la ïatai eiei ha ka jingïalang ka Core Committee namar lehse ka dei tang ka jingkren sha ki lad pathai khubor, hynrei na ka liang jong ngi ngi pynpaw ïa ka jingpynrem kaba jur ïa kane ka jingleh ki pulit ha kato ka sngi” u la ong.
Na ka liang u Bah Titos u la pdiang ba kaei kaba jia ha kato ka sngi ka pynphalang ïa ka jingpheil jong ka bor synshar district ban pynthikna ba ka shongsuk shongsaiñ kan neh.
U Bah Titos u la ïada ruh ïa u Bah Rymbui da kaba ong ba ka jingbym lah jong u ban shim ïa ka rai marmar namar namar um dei ma u ba bat ïa tnat pla tyngka.
U Bah Titos u la ong “Kane keiñ ka jingeh kaba mih na ka sorkar khleh khawlang namar kito kiba ïoh ban ïalam ïa ka sorkar ki kham ïoh jingmyntoi ban ïa kipara ba don lang ha ka sorkar. Lada phi peit bha, kum u myntri ka tnat pule puthi kaei ka jingeh kaba u hap ban ïa kynduh ka long ba ki nonghikai ki dawa ïa ka tulop jong ki hynrei na ka liang jong u(Lahkmen) um lah ban shim ïa kano kano ka rai namar ym shym la bat ïa ka tnat pla tyngka, lehse un peit ïa ka tnat pule puthi hynrei ban shim ïa ka rai ban pyllait tulop um don bor satia namar ïa ka pla tyngka la bat da kiwei pat ki myntri bad dei tang ma ki hi ba lah ban shim rai halor kane,” u la bynrap shuh shuh “mano ba kwah ïoh nam bad mano ba dei hok ban ïoh ïa ka nam, ki paidbah ki tip bad ai ki paidbah hi kin rai halor kane”.