14 tarik yn ïakynduh ka Regional Committee WKH bad ki nongïalam ka thaiñ Langpih

Shillong, Risaw 11: Ka Regional Committee na bynta ka West Khasi Hills ba la thung da ka sorkar jylla ban sorjamin ïa ki jaka ba ïa kajia pud ha ka thaiñ Langpih kan sa shong ïa ka jingïalang bad ki Rangbah Shnong jong ki shnong ba hap ha ka thaiñ langpih ha ka sngi Thohdieng mynta ka taiew ha Nongstoiñ ban ïakren ïa ki sienjam kiba dei ban shim na ka bynta ka jingpynbeit pud jong ka wat kaba ar.
“Hadien ba la dep thaw ïa ka committee bad ban jied ïa ki dkhot, na ka liang u Deputy Commissioner ka West Khasi Hills ruh u la dep ban pynbna ïa kane bad ha kane ka jingïalang ngin ïa kren ïa ki lad bad ki sienjam kiba ngi dei ban shim na bynta kane ka kam ïa pynbeit pud,” ong u Chairman ka Regional Committee na bynta ka West Khasi Hills u Bah Renikton Lyngdoh ha ka jingïakren bad ki nongthoh khubor.
U la ong ruh ba kane ka jingïalang ka long beit shuwa thik ban sngap ïa kaei kaba ki paidbah ba sah ha khappud ki sngew.
Haba kylli la kan mih ne em ka jingeh ha kane ka jingïapynbeit pud, u Bah Renikton u la ong ba ki jingeh lei kin mih beit hynrei na ka liang ka committe ka la dep pynkhreh lypa ban mad ïa kata.
Ka thaiñ Langpih kan dei ka thaiñ ba jwat ha kane ka jingïapynbeit pud namar ba ka dei ka thaiñ kaba ïa shong khleh jaidbynriew bad ba ki jaidbynriew Nepali kiba la buhai shnong ha kane ka thaiñ ki kham noh ka mon ban ïaineh beit hapoh ka jylla Assam.
“Ngin leh ïa kaba bha tam, hynrei ngam lah ban kular ba kan ym don kano kano ka jingsngew pyrshah na ka liang jong ngi hi ngi kwah ba 100 na ka 100 kin hun ïa kaei kaba ngi leh hynrei la jar katta kan don hi ka jingbym hun. Nga khmih lynti ba kito ki shnong kiba kwah ban don bad ka jylla khamtam eh kito kiba shong da ki Khasi bad Garo kin poi sha ka jylla namar ka jinglong jaidbynriew jong kito kiba shong ha kito ki shnong kan dei kawei na ki mawser ban rai sha kano ka jylla kin don bad nga kyrmen ba ka sorkar Assam ruh kan burom ïa kane” u la ong.