Kyan ka jingkynad jaidbynriew ha Jatalong ba shah shoh ki Dkhot KSU bad HNYF

Nongpoh, Ïaiong 02: Ka jingïakynad pher jaidbynriew hapdeng ki Khasi bad ki Nepali kala kyan mynta ha ka shnong Jatalong, Ri-Bhoi District kaba don ha khappud ka Assam, kaba la mih na ka jingshah shoh ki bun ngut ki samla Khasi ba na ka shnong Khyndewso ha kine ki jaidbynriew mynder ri.
Haduh saw ngut ki samla Khasi kila mynsaw jur bad bun ngut kila mynsaw malu mala na ka jingïakajia bad ki paid Nepali hynnin ka miet ha Jatalong, ka shnong kaba buhai shnong bun paid bha da ki Nepali. Kine ki samla ba shah shoh ki dei ruh ki Dkhot jong ka Khasi Students Union (KSU) bad ka Hynñiewtrep National Youth front (HNYF).
Kat kum ka khubor, kane ka jingïakajia kala mih tang na ka daw ka jingiadait dor ïa ka kyaid kaba die be-aiñ ha kawei ka dukan ki Nepali. La ïathuh ba laingut ki samla Khasi kila leit thied jingthied na kane ka dukan bad iadait dor ïa ka mar ka mata hynrei la kynnoh ba ki Nepali kila pynibor pynban bad ktah kti ïa uwei napdeng kine ki samla.
La ïathuh ba ki arngut ki samla Khasi kila pyrshang ban iarap ïa une u paralok hynrei la kynnoh ba ki Nepali kila mih pynban da ka kynhun bad kila thombor beit beit ïa kine ki samla kiba la pyrshang ban phet krad ban pyntip shala ki jong ki para shnong.
Kine ki saw ngut ki samla khasi ba shah shoh ki dei kiba la tip kyrteng u Bah Barnabas Lyngdoh, u samla Sildron Mukhim bad ki arngut ki bym pat shym la ïoh kyrteng satia.
Ki arngut kiba la mynsaw jur tam na kane ka jingshah thombor ki dei u Bah Barnabas Lyngdoh uba la mait da ka wait khukri na ki bynta ka durkhmat hadien ka jingshah tied shah bom, shah kura ha ka jingpyrshang ban iada ïalade lem bad u samla Sildron Mukhim uba la shah bom ha ki bynta ka durkhmat nalor ka jingshah kyrdem.
Haba ïakren bad u Mawphor, kine ki samla ba shah shoh ki pyntip ba ka jingsdang jong ka jingïakajia ka mih tang namar ka jingiadait dor ïa ka mar ka mata hynrei ki Nepali kila mih paidbah pynban ban ktah kti bad thombor ïa baroh saw ngut ki samla.
Kine ki ssamla ki pyntip ba la don napdeng jong ki, kiba la ïoh pyntip ïa kane ka jingjia sha ki Nongïalam ka KSU bad HNYF bad ki para samla jong ka Shnong Khyndewso hynrei haba ki samla Khyndewso kila poi ha kane ka jaka, kila shah thombor lang ha ki paid Nepali kiba la ap lypa ha katei ka ajka ryngkat ki tiar pynmynsaw bad ka jingsynran jong ki Pulit ka Assam.
Haba ïoh jingtip ïa kane, ki Magistor bad ki Pulit ka Ri-Bhoi District hapoh ka jingïalam u Bah MB Tongper, Additional Deputy Commissioner (ADC) kila hiar hynne ka step sha kane ka jaka ban tem ïa ka jinglong jingman bad ban khanglad ruh ïa ka jingwan rung jong ki kynhun Sengbhalang sha Jatalong.
Na ka liang ki Pulit ka Jylla Meghalaya bad Assam, kila syrtap ïa ka shnong Jatalong ban pynkhlaiñ ïa ka jing pahara khnang ba kan nym mih kano kano ka jingjia kaba lah ban nang aiding shuh shuh ïa ka jingïakynad.
U Bah MB Tongper ADC ka Ri-Bhoi District u la pynpaw ruh ba kumba long mynta la lah ban tem ïaka jingkynad bad kam dei satia naka daw ka jingsngewpher jaitbynriew hynrei ka dei tang ka jingïapher jingmut ha kawei ka dukan kyiad, bad kyrpad ruh ïa kiwei kiwei naduh ki kynhun sengbhalang ba kim dei ban pynshit ïa katei ka jingjia khnang ba ki paidbah kin shongsuk shongsaiñ ha katei ka jaka. Ula pyntip ruh ba ki bor jong ka aiñ kila shimkhia ban thwet ïa kiba donkti bad ban khang noh syndon ïaka dukan kyiad beaiñ kaba don ha katei ka jaka.