Ai kin mat ïuh ki kali ki Myntri Sorkar hynrei ngin shong beit hangne: Nonghikai Kontrak

Shillong, Risaw 06: Hadien ba ki nonghikai kontrak mynta ka sngi ki la tur sha ka kyrdop jong ka Secretariat ban shong ïakhih ha katei ka jaka wat hadien ba ki bor pulit bad ki bor synshar district ki la siat da ki bom pynsat khmat hynrei na ka liang ki nonghikai ki la tur beit haduh ban da poi sha ka jaka ba ki mut.
Haba kren bad u Mawphor hadien ba la kut ka jingpynibor u Babu birbor Riangtem u President jong ka meghalaya Government Lower Primary School Contractual Teachers’ Association(MGLPSCTA) u la ong ba na ka liang jong ki nonghikai baroh ki la rai beit triang ban shong ïakhih ha kane ka jaka. U la ong ruh ba hadien ba ki la lah ban poi sha katei ka jaka hapdeng ki jingshah khang lynti kaba la don ruh ka jingsiat bom sat khmat na ka liang jong u ryngkat ki nonghikai ki la rai ba lada ka sorkar bad u Myntri Rangbah u la iwit palat ïa ki ruh ai kin mat iuh pynïap noh syndon ïa u.
“U Conrad bad u Lahkmen ai kin iuh pynïap noh ruh namar ki la kheiñ ba ngim long eiei shuh ha khmat jong ki” u la ong.
“Lehse kin ong ba ngi dei ma ngi kiba pynkheiñ aiñ hynrei peit hi ma phi mano ba pynkheiñ aiñ, ïa ki nonghikai kynthei ruh ki pyntur beit da ki pulit shynrang bad ki ktah kti beit ma ki ruh bad ïa ki khunlung khynnah ruh kim kheiñ shuh bad ki siat beit da u bom pynsat khmat hato bishar hi, ngi pynkheiñ aiñ ma ngi ne ki bor ka aiñ” u la ong.
Haba jubab la u don ne em ka jingmynsaw u Babu Birbor u la ong ba na ka liang jong u u la don ka jingmynsaw ha ki bynta budlum bad ka jingpang ka kjat bad ka met baroh shi rynïeng hi kaba u la shitom wat ban wat ban ïeng ne ban khih na ka jaka ba u shong. La ïohi ruh ba u Babu Birbor la hap ban shu snoh ha ki para nonghikai ban khih bad ïaid ban ïeng.
Haba kren halor ka jingïapynibor hapeng ki pulit u Babu Birbor u la ong ba ha ka jingshisha ki nonghikai ki wan beit da ka lynti ba jaijai hynrei dei ki pulit hi kiba sdang ban pynkulmar da kaba ki siat da u bom pynsat khmat kat haduh ba ki nonghikai ki hap mareh kulmar.
Haba ïa kren bad kiwei pat ki nonghikai ki la o ng ba kaei kaba jia ha kane ka sngi ka long kaei kaei kaba na ka liang jong ki kim mut dur ba ka sorkar lyngba ki bor pulit kin shim ïa kat kane ka sienjam khlem map shuh wat ïa ki nonghikai kynthei bad ki khun jong ki kiba wan ban synran lang.
Shuh shuh ki la ïathuh ruh ba ki don ki nonghikai kiba armet ruh kiba la wan shim bynta sha kane ka jingïakhih ha kaba na ka liang ka sorkar kam kheiñ snep satia wat ïa kane ruh.
“Lada jia eiei ïa ki khunlung jong kinto ki nonghikai ba armet hato ka sorkar kan shim jingkit khlieh mo bad lada jia eiei ïa ka kmie ruh kaei kaba ka don ban ong” la kren ki nonghikai.