Dawa tohkit ka HYC, kyrpad ïa ka HC bad MHRC ban ujor Sou halor ka jingsiat tear Gas 

Shillong, Risaw, 06: Ka Hynñiewtrep Youths Council (HYC) ka la dawa ïa ka Sorkar Jylla ban thung da ka kynhun tohkit khnang ban lap ïa ka jingshisha bad ban pynshitom ïa ki Pulit lane ïa ki Majistor kiba aibor ban kawang da ki bom pynsat khmat ïa ki nonghikai skul kontrak kiba don hapoh ka shatri jong ka Meghalaya Government Contractual Teachers’ Association (MGLPCTA) kiba tur sha ka Secretariat ha ka sngi Thohdieng.
“Ngi dawa ba ka Sorkar kadei ban thung ïa ka kynhun tohkit ban lap ïa ka jingshisha halor ka jingjia mynta ka sngi bad ban pynshitom ïa ki Pulit lane ïa ki Majistor kiba lah aibor ban siat tear gas sha ki nonghikai bad ki khun ki kti ki jong ki khnang ba kum kine ki jingjia kin nym jia shuh nangne shakhmat,” ong u kyrwoh na HYC lyngba u General Secretary u Bah Roy Kupar Synrem.
“Ngi dawa ba ka Sorkar u Conrad Sangma ka dei ban shim ïa ka jingkitkhlieh ban pynshitom ïa ki Pulit kiba leh tam pud bad pyndonkam palat pud ïa ka bor ka jong ki da kaba siat tear gas ïa ki nonghikai bad ki khun ki kti ki jong ki hakhmat Secretariat mynta ka sngi,” u la ong.
“Ngi kyrpad ruh ïa ka Meghalaya High Court Badonburom bad ïa ka Meghalaya State Human Rights Commission ba kan shim kam da lade hi (sou Moto) ïa kane ka jingjia bad ba kan tohkit bad pynshitom ïa ki Pulit bad Majistor kiba donkti ha kane ka jingpyndonkam bakla bad palat pud ïa ka bor ka jong ki kaba lah wanrah ïa ka jingmynsaw ïa ki Nonghikai bad buh jingma ïa kiwei pat,” la kyrpad ka HYC.
“Kane ka jingleh jong ki Pulit ban siat da ki Tear Gas sha ki nonghikai ba kynthup ïa ki nonghikai kynthei bad ki khunrit ki jong ki kaba lah wanrah ruh ka jingpynsaw ïa ki katto katne ki nonghikai, ka long kaei kaei ka ba ngim lah ban pdiang. Hato kitei ki Nonghikai lem bad ki khun jong ki ki dei ki nongleh be-aiñ? la buh jingkylli ka seng bad bynrap, “hato ki dei ki dkhot jong kano kano ka kynhun ba lah kheiñ be-aiñ da ka Sorkar? Hato ki rah ïa kino kino ki tiar pynmynsaw lane ki ïakhih da kano kano ka jingmut kaba long be-aiñ kaba la pynlong ïa ki Pulit ban siat tear gas ïa ki?”
“Ha ka jingïohi ka jong ngi lyngba ki video kiba paw, ngi khlem ïohi ba kine ki nonghikai lane ki khun ki kti ki jong ki ba kin rah kino kino ki tiar pynmynsaw ne pyni kino kino ki dak ba kin leh ïa ki kam be-aiñ. Haba kumta, ka shong hok mo ïa ki Pulit ban pyndonkam ïa ka bor ka jong ki shaba palat pud? Kumno kim pyrkhat ba ha kane ka jingïakhih ba jaijai ki don ruh ki khyllung khynnah bad lyngba ka jingleh ki Pulit ka lah pynban ban buh jingma ïa ka jingim ne pynmynsaw ïa kine ki khyllung khynnah,” la kynthoh ka Seng.
“Mano ban shim jingkitkhlieh lada jia kino kino ki jingjia ba sngewsih ïa ki Khyllung khynnah? Balei ba ki Pulit ki hap ban shim ïa kaba kum kane ka sienjam, ka long ka jingkylli kaba ngi kum ki paidbah nongshong shnong jong ka Jylla ngi hap ban tip bad sngewthuh,” la bynrap shuh shuh ka HYC.