Mih ki nongïalam bad ki dkhot ka JSM ban dawa na u Lakmen Rymbui ia ka Government College ha EJHD

Jowai nalur 30: Ki nongialam bad ki dkhot jong ka Jaintia Students Movement, mynta ka sngi ki la ia mih ban pynsngew sha u bah Lakmen Rymbui ha ryngkat bad ki lama, ki pla card ryngkat ka jingpyrta kum ka jingpynkynmaw ia ka jingdawa College Sorkar kaba dei ka jingdawa kaba khlem pat lah ban pynurlong haduh mynta, kane ka jingmih ki dkhot ka JSM ka dei hajan ka Kiang Nagbah College ha Jowai, namar ba ha kane ka sngi utei u myntri ka sorkar jylla u la wan ban pyndep ïa ki kam kiba ïadei bad katei ka college ha Jowai.
La ong ba ki dkhot jong ka Jaintia Students Movement tang shu ioh jingtip ia ka jingwan u Lakmen Rymbui, uba dei u myntri uba peit ïa ka tnat pule puthi jong ka sorkar jylla, ki la ialum lang bad tur shakhmat ban pyrta ïa ka jingdawa college sorkar ha East Jaiñtia Hills District.
Haba kren sha ki pathai khubor, u Education Secretary jong ka JSM central Body, u samla Heyboyme Myrpet, u la ong “Sngewsih ban ong ki hynñiew ngut ki nongmihkhmat kiba na ri lum Jaintia kim treh ban rah ïa kane ka mat jingdawa college sorkar hakhmat ka iïng dorbar thaw aiñ, ngi iohi pynban lyngba ki pathai khubor ba ka sorkar ka la wanrah pynban da ka jingkhalai casino, ngi na la liang ka seng ngi kwah ba kin wanrah ïa ka mat jingdawa college sorkar, namar wat ka jylla Assam kaba heh ruh kam pat wanrah ia ka casino hynrei hangne pat ka sorkar ka wanrah pynban da ka casino, kumta ha kane ka por ngi na ka liang ka seng ngi ban jur ba ka soarkar ka dei ban wanrah ia ka college sorkar hapoh East Jaiñtia Hills District, ka ban long ka jingiarap kiba duk ba shitom ba kin ioh ïa ka jingnang jingstad, lada ka sorkar kam sngap ïa kane ka jingdawa, nangne sha khmat ka seng kan sa nang pynjur shuh shuh ia ka jingiakhi ha ri lum Jaiñtia”
Kum ban shu pynkynmaw, ka jingdawa jong ka Jaintia Students Movement Central Boday ban don noh ka college sorkar ha East Jaiñtia Hills District, ka dei ka jingdawa kaba naduh u snem 2015 bad ka seng ka la pyn her bun tylli ki jingthoh sha ka sorkar naduh u snem 2016 ter ter bad pynlong ruh bun ki prokram jingiakhi bad jingïalang bapher bapher ban pyn sngew sha ka sorkar ïa kane ka jingdawa jong ka seng kaba kat haduh mynta ym pat shym la lah ban pyn urlong.
U President rangbah ka Jaiñtia Students Movement u bah Leningstar Rymbai u ju pympaw ka jingsngew khia bad ong ba ‘Ka jylla Meghalaya ka dang shu dep ban rakhe ïa ka jingdap san phew snem ka jingioh jylla la ka jong, hynrei dang don shibun ki jaka, ki shnong ha ka jylla kiba dang sah dien bad shah iehnoh beiñ ha ka sorkar ha kiba bun ki liang, kumba ngi tip ba ka East Jaiñtia Hills District ka dei ka district kaba ju kyrshan radbah ïa ka sorkar ha ka jingioh khajna namar ka East Jaiñtia Hills ka dei kaba riewspah ha ka jingdon ki mar poh khyndew kum u dewiong, u mawshun, ka jingdon ki karkhana dewbilat bad kiwei kiwei ki jjingdon ka spah mariang, hynrei imat ka sorkar ka shu pynlong ïa kane ka district tang kum ka jaka ban lum spah ialade khlem phai khmat pat halor ka roi ka par jong ki paidbah bad kumno ban kyntiew ia ka thaiñ, kane ka long kaei kaei ba ngi kum ka seng ngi sngew khia haduh katta katta namar kane ka paw ba ka dei tang ka jingshah ibeiñ ha ka sorkar”
U la pynpaw ruh ba ka long kaba donkam haduh katta katta ban don ka college sorkar ha East Jaiñtia Hills District khnang ba ki samla pule kiba na jan bad na jngai kin ioh ban bteng ïa ki jingpule jong ki khamtam kito kiba dang duna ha ka ioh ka kot ki bym donlad ban phah pule shabar, la ong ruh ba bun ki samla pule ki hap ban shu iehnoh noh tang shiteng por ïa ki jingpule tang na ka daw ba kim kot bor ban phah pule sha bar ‘ka sorkar ka ong ba ka kwah ban kyntiew ïa ka jingnang jingstad ha ka jylla katba tang kawei ka college sorkar ruh kam lah ban wanrah ha East Jaiñtia Hills District, hato ka lawei jong ki samla shano kan poi’ la pynpaw shuh shuh utei u nongialam ka JSM.
U la ong ba ka long kaba i sangsot ban peit ïa ka district kaba dang lung bad kaba dang don shibun ki jingduna kynthup naduh ki jaka pule, ki jaka ai jingsumar, ki surok, ki lynti ki syngkien, kum ka district kaba ju iarap bad kyrshan ïa ka sorkar da ki khajna bapher bapher ka la dei ban pyrkhat lem ban wanrah ïa ka roi ka par ha ka district, hynrei sngewsih pat ban ong ba ka sorkar ka shu pyndonkam ïa kane ka district tang ban lum spah ialade khlem pyrkhat lem ïa ka bha ka miat jong ki paidbah, ïa ka roi ka par jong ka thaiñ.
U la iathuh ruh ba naduh ka por jong ka sorkar MUA-1, MUA-II bad kane ka sorkar MDA ka seng ka la dep ban buh shibun ki jingthoh bad ki memorandum jingdawa bad ka seng ka la ju wad ruh ia ki lad jingiarap na u myntri sorkar, uba dei ruh u MLA jong ka thaiñ, u bah Kyrmen Shylla , hynrei kane ka jingdawa ka dang sah ha suiñ khlem pat lah ban pyn urlong, ha ka jingshisha, kane ka sorkar MDA ka la kular ba kan sa pyn ioh ïa ka college sorkar hynrei mynta lah jan kut sa ka samoi ruh khlem pat iohi dak eiei ruh bad ka sorkar ka shu leh klet beit halor kane ka mat jingdawa jong ka seng.
Kumban shu pynkynmaw, ha ka jingialang ba kyrpang ba la pynlong da ka Jaintia Students Movement ha u snem 2018 ha shnong Wapungskur kaba la buh da ka phang pdeng ‘Hato phim kwah College sorkar ha East Jaiñtia Hills?” bad dei ha kane ka jingialang ba u nongialam ba rangbah jong ka seng u bah Leningstar Rymbai u la aiti ruh ïa ka memorandum sha u myntri sorkar, u bah Kyrmen Shylla ban pynsgew ïa ka jingdawa ka seng ban pynioh college sorkar hapoh East Jaiñtia Hills District bad haduh mynta ka seng ka dang ïai bud dien ia kane ka jingdawa.