Tura, Iaiong 1 : Ki Seng Bhalang bapher bapher jong ka North Garo Hills ki dawa na ka sorkar ba ka dei ban pynneh ïa ka karkhana pynmih marbam (Food Processing Centre) kaba la seng nongrim naduh ka por ka Sorkar Assam ha u snem 1964 ha Dainadubi ym ban pynkynriah ïaka shawei pat.
Halor kane ki la ai da ka shithi sha u Myntri ka tnad kam rep kam riang u bah Banteidor Lyndoh lyngba ki ophisar ka tnad ha North Garo Hills.
Kine ki seng bhalang ki pynpaw ba kane ka karkhana ka dang treikam haduh mynta mynne bad ka la long ka jingkyrkhu kaba khraw ïaki nongrep jongka thaiñ baroh shi katta namar ki ïoh ban leit die ïa ki soh ki pai bad ki mar rep jongki ha katei ka karkhana kaba pynmih pat ïa ki marbam bad shalan pat sha kiwei ki jaka.
ïa kane ka karkhana la seng nongrim khnang ba kan ïarap ïaki nongrep kiba duk ha katei ka thaiñ bad ki la ïoh jingmyntoi da shisha na kane ka karkhana. Kumba ka long mynta ïa kane ka karkhana la nang pynheh bad la jan dep artat ban tei ïa ka bad kaba sah ka long sa tang ban pyndait ïa ki mashin khnang ban pynmih bun ki marbam ha ka shisngi.
Kumba ki seng bhalang ki la ïoh jingtip ka long ba ïa kane kaba ha Dainadubi ka sorkar ka mut ban shu aiwai shaki kompani shimet bad ka thmu ban thaw sa kawei pat ha West Garo Hills. Lada lilam noh ïa kane ka karkhana kan ktah ïa ki nongrep kiba pli.
Namar kumba long mynta ki ïoh ban dielang beit ïa ki mar rep jongki bad ka jingïoh jongki ka biang hynrei lada ki hap ban die khutia tang ka bai kali ruh ka la ktah jur ïaki. Kumta lada pynkynriah kan ktah jur da shisha ïaki nongrep kiba duk ha katei ka thaiñ hi baroh kawei.
Kumta ki seng bhlang ki kyntu jur ïa u myntri ka tnad ka rep ka riang ba un pynsangeh mardor ïa kane ka jingthmu pynkynriah ïakane ka karkhana sha kawei pat ka jaka.
