Shillong, Nailur, 22: U Symbud Myntri Rangbah barim ka jylla ba dei ruh u nongïalam ba la slem bad rangbah bha ha ka party UDP Bah Bindo M Lanong ha ka sngi Palei u la ong ba ki jingkheiñ kin bakla lut lada ka party ka bakla ka rukom ai tiket ha u 2023.
Da kaba pyntip ba u ruh u dei u kyrtong ba pan tiket ban ia khun ha u 2023 na Nongkrem Constituency, utei u rangbah u la ong, “Lada bakla ai tiket ha u 2023 ka jingkheiñ kan sa bakla lut.”
Haba pynpaw ïa ka jingkren artatien ki nongïalam ka party pyrshah ïa u, u Bah Bindo u la ong, “Nga don ha ka UDP te, nga khmih lynti ba ka party kan pyrkhat bha namar baroh shi katto ki ong em, ki mut ban ai shawei sha bym dei UDP. Te hynrei haduh mynta pat kim pat ïa rai ne ïaleh ei ei te nga shu pyrkhat ba ki dang ïa pyrkhat bha. Nga shu khmih lynti kan long kumta lehse, ïoh kin kylla kaba mut bad pyrkhat biang ïanga.”
Shuh shuh u ong ba lada jia ba ka UDP kam ai tiket, un ym kynran dien noh hynrei un ïaid beit shakhmat namar um kwah ban pynsngewsih ïa ki nongïalam bad ki nongkyrshan kiba la treilang baroh shi katta.
Halor ka jingkylli la un ïakhun kum u kyrtong shimet lane un wad jaka na shawei pat, u Bah Bindo u la ong, “Uta u pud um pat poi, hynrei lada poi uta u pud ngan sa peit. Tangba nga pyntikna ba ngan ïaleh beit hynrei lada jia ba ka UDP kam ai tiket, na kano ka party ngan ïakhun ngan ym pat lah ban ong mynta.”
Kum uwei na ki nongïalam ba la rim tam ha ka UDP naduh ba mih ka party ha u 1997, u pynpaw ka jingkyrmen ba kiwei kiba wan hadien kin peit ïa ka history kumba ka long. “Nga ïohi ïa ka jingong ba ka tiket kam dei ka nongkynti jongno jongno kata kadei ka jingshisha bad nga mynjur ïa kata, hynrei peit pat ïa ki nongrim kiba ki buh kyndon bad kheiñ jingkhein bad halor kita ki nongrim ki dei ban peit mano ba kham bit khnang ban wanrah ïa ka jingjop,” u la ong.
Shuh shuh u ong ba lada ki leh kumta ka biang hynrei lada kim leh hok ka jingkheiñ kan sa bakla nadong shadong. “Namar nga la dep ong lypa ba ïa u briew uba ki mut ban ai tiket u dei u briew u bym donlang bad ngi bad u dei uba la don na kawei ka kynhun sha kawei pat bad hanga hi um long shuh katkum ka jingkynduh jongngi bad ki paidbah. Hynrei ha ki pat ki ong ba nga ngam long bad u kham lah ma u. Te ngin sa ïa peit ka long kumno,” la bynrap shuh shuh utei u rangbah.
Lah ban kdew hangne ba ki khubor ki la phriang kylleng ba ïa ka tiket MLA ha u 2023 na Nongkrem ka UDP ka thmu ban ai sha u Bah Lambor Malngiang ba dei MLA shimet na katei ka thaiñ.
