Shillong, Nailur 22: Ka Khasi Student Union, NEHU ha ka sngi Palei ki la dawa ba ka NEHU ka dei ban kynthup lang ïa ki ST kyrpang eh ïa ki samla pule Khasi jong ka skulbah NEHU ha ka prokram ai jinghikai ei(free coaching) lyngba ka Dr Ambedkar Center of Execelence na bynta ki samla kiba don jingthmu ban ïakhun ïa ka eksamin UPSC ym ba kan ai jinghikai tang ïa ki samla pule na kiwei pat ki jaidbynriew kiba dei na ka thup Scheduled Caste(SC).
Haba kren sha ki lad pathai khubor u General Seceretary jong ka KSU NEHU u Samla Shibaitlang Rymbai u la ong ba ki bor pynïaid ka NEHU kim dei ban peit kyrpang tang ïa kiwei ki jaidbynriew ban klet noh pat ïa ki trai muluk ha ka jingai jinghikai na bynta ban pyntbit ïa ki samla ban ïakhun ïa ka UPSC. U la ong ruh ba lada ka NEHU ka kynthup beit tang ïa ki SC ha ka jinghikai bad kyntait ïa ki Khasi ban kynthuplang na ka liang ka KSU kan ym ai lad syndon ba kan treikam.
“Ngi kwah ban kren da kaba shai hangne ba ka NEHU ka dei ruh ban ai bhah ha kane ka jingai jinghikai ïa ki samla Khasi namar lada ki samla pule na ka jaidbynriew kin ioh lem ïa ka jingshah hikai khlempep kan long ka jingmyntoi ïa kiba wan na ka ïing ba duk ki bym kot bor ban shah hikai ha ki jaka ai jinghikai shimet na bynta ba kin ïakhun ïa kane ka eksamin” u la ong.
