Shillong, Nailur, 22: Ka sorkar jylla lyngba ka tnad PHE mynta ka kynti ka la phah ka jingtyrwa sha ka sorkar pdeng ba kan kynthup ïa ki shnong ba don hapoh New Shillong Township (NST) ha ka skhim Jal Jeevan Mission (JJM) na bynta ban pynpoi um sha man ki thliew ïing hapoh kine ki shnong.
U Myntri ba dei peit jong ka tnad PHE u Bah Renikton Lyngdoh Tongkhar u la ong, “Katba ka jingpynkhreh ïa ka DPR ba thymmai ban pynrit ïa ka dor jong ka skhim, New Shillong Township Water Supply Scheme (NSTWSS) na ka liang ka tnad ka la phah ruh ïa ka jingtyrwa ban kynthup ïa kine ki shnong hapoh ka skhim JJM.”
U la ong ruh ba na ka liang ka tnad kan ym ap satia haduh ban da dep ka jingpynkhreh ïa ka DPR namar na ka liang ka sorkar ka la bthah ba ka tnad jan pynrit ïa ka dor kane ka skhim da marshiteng na kaei kaba la phah jingtyrwa kham mynshuwa.
U la ba kiba bun hi ki shnong ki la shah kynthup ban ïoh um lyngba ka skhim JJM bad na ka liang ka tnad kan hap ban pynleit jingmut sa ïa ki shnong kiba ym shah kynthup satia.
Ïa ka skhim NSTWSS la ïoh jingmynjur ban ai ïa ka song pisa ha u Lber jong u snem 2014 lyngba ka Special Plan Assistance (SPA) kaba kot kumba 321.28 klur bad Rs 9 klur la dep ban pynlait sha ka tnad na ka SPA bad 11 klur na ka bhah ka sorkar jylla bad ïa kane ka pisa la pyllut ha ka ban thied ïa ki pipe um ïathuh u Bah Renik.
U Bah Renik u la ong ruh ba na ka liang ka tnad ka la buh thong ban pyndep ïa ka Greater Shillong Water Supply Scheme (GSWSS) phase-III ha une u snem bad u la ong ba la mang shuh sa 65 klur na bynta ban pyndep noh ïa kane ka projek.
