Hiar ki seng bhalang sha khanapara, khang ki pulit ba thmu pynpra ïaka khyrdop Casino

Nongpoh, Nailur 22: Ki 4 tylli ki seng ba kynthup ïaka HANM, MPUF, RBYO bad MPSO mynta ka sngi kila hiar sha ka thaiñ Khanapara ha Ri Bhoi ban leit jurip ïaka jingtei ïaka ktem khalai ne Casino kaba la iaid shaid shaid ha Ri Bhoi District, ba kum ki kynhun seng kila pynpaw ka jingpyrshah jur bad kim lah shuh ban shanñiah ïaka sorkar kaba la shu kular tang ka ktien ban pynsangeh iïa katei ka ktem khalai katba 3 ngut ki briew kila ioh ïaka license ba shipor ban buh ktem khalai.
Ha katei ka jingleit jong kitei ki kynhun seng kiba thmu ruh ban leit peit bad khmih haduh katno ka jingtei ïa katei ka ktem khalai pynban la lap ba ka khyrdop jong katei ka ktem khalai kala khang khyrdep bad kim shym la ioh ban rung shapoh ha kaba kila sdang ban pynpra ïaka khyrdop bad dei hadien ka jingïakren bad ki bor pulit ba kitei ki kynhun seng kila sangeh bad shu pynlong tang ka jingïarah placard bad pynpaw ïaka dak pyrshah halor ka Casino ha Ri-Bhoi.
Kum ka jingai mynsiem bad ka jingpynshngaiñ ïa kitei ki kynhun seng kiba la hiar sha katei ka jaka naka liang u Bah George B Lyngdoh MLA ka Umroi ba dei ruh u Chief Whip ka liang pyrshah u la hiar sha katei ka jaka ban don ryngkat shipor bad kitei ki kynhun seng ha Khanapara shuwa ba un leit pat ban beh ïa kiwei kiwei ki kam.
U Bah Pateng Myrsing President ka HANM Ri-Bhoi, u la ong ba kadaw kaba la pynlong ïaki kynhun Sengbhalang ban leit hiar sha ka thaiñ Khanapara ha katei ka sngi ka dei ban iohi da la ki jong ki khmat halor ka jingtei ïaki Casino kumba kim lah shuh ban shaniah ïaka sorkar kaba shu kren tang haka ktien, kumba dang ha kine ki khyndiat sngi haka Dorbar Synrai la sakhi ba wat hadien ba kala sorkar kala pynbna bala pynsangeh noh ïaka Casino pynban la dep ban ai license sha kumba 3 ngut ki briew haka jylla naka bynta ban buh Casino.
U la ong ba kum ki kynhun seng kin nym ailad da lei lei ruh ïaka Casino ba kan treikam haka jylla namar ngi tip shai ba lada katei ka ktem khalai kan wan, kiwei kiwei ki jait kam sniew kila don lypa ha katei ka jaka kaba ktah ïaka lawei jong ki khun samla, haka jaka ban wanrah da ki jaka pule bad ki jaka kiba ai jingmyntoi bad kyrkhu ïaki khun samla.