ïaknieh u Bah Kharkrang bad Bah Michael na ka BJP North Shillong

Shillong, Nailur 22: Ka jingïaknieh ïa ka tiket BJP na North Shillong Constituency mynta ka la nang kham itynnad shuh shuh ha kaba u Bah Martamlin Pyrbot uba dei uwei na kiba pan tiket BJP ha ka sngi Palei u la rai ban randien noh bad rai pat ban ai jingkyrshan noh ïa u Bah Michael Kharsyntiew ban pynioh ïa ka tiket BJP na kane ka Constituency. Ïa ka tiket BJP na North Shillong ka don ka jingïaknieh hapdeng u Bah Michael Kharsyntiew bad u Bah Mariahom Kharkrang uba dang shu ïasoh shen ruh sha ka BJP.
Haba kren sha ki lad pathai khubor u Bah Michaeel Kharsyntiew u la kyntait war ba ïa ka tiket BJP na North Shillong la dep ban rai ba yn ai sha u Bah MH kharkrang da kaba ong ba ïa ka tiket BJP ym ju don ba lah ban rai lupa tang da ki nongïalam ka BJP Meghalya hynrei kat kum ki rukom dei ka BJP Central Election Committee ryngkat ka Pary High Command kaban shim rai ïano ka ibit ban pynïakhun na ka tiket.
U la ong ba da ka jingrai u Bah Martamlin ban randien noh na ka jingpan tiket da kaba u rai ban ai jingkyrshan noh ïa u kum u nongpan tiket na ka BJP, u la ong ba kane ka dei ka dak jingkyrmen ba un nangkham ioh bor shuh shuh bad kham pynskem ïa ka jingpan tiket jong u. U la ïathuh ba kat kum ki rukom ka BJP ka ju pynlong shuwa da ka sorbe ban wad bniah mano ba kham don jingkyrshan na ki paidbah hapdeng kiba pan tiket bad dei ynda la dep kane ka party ka ju rai ïano ban ai tiket.
“Da ka jingrai i Bah Martamlin ban ai jingkyrshan noh ïa nga kum uba pan tiket kan nang pynkhlaiñ shuh shuh ïa nga namar ma i ruh i dei uba la bun ki nongkyrshan” u la ong.
Haba la kylli halor ka jingwan pynïasoh u Bah MH Kharkrang sha ka BJP u Bah Michael u la ong ba na ka liang jong u kum u dkhot ba dang samla ka BJP bad u nongtrei ba shitrhem ruh jong ka party u pdiang sngewbha lada ki riew rangbah kiba kum u Bah MH Kharkraang ki wan ban pynïasnoh ïa lade sha ka BJP.nrap lang ïa kane u Bah Martamlin Pyrbot u la ong ba ka jingrai jong u ban ran dien na ka jingpan tiket ha kaba un kyrshan noh pat ïa u Bah Michael kharsyntiew ka dei ban pynthikna ba ka BJP kan ioh biang ban bat ïa kane ka seat kaba ka ju bat ha ki snem ba shuwa ban don ka jingphiah constituency.
U la ong ruh ba kumba long mynta ka jingjop na kane ka constituency ka la don lupa ha ka liang ka BJP lada ka BJP kam bakla ban ai tiket.
Haba kylli halor ki sienjam kiba na ka liang jong ki kin shim lada ka BJP kam ai tiket ïa u Bah Michael hynrei kan jied pat ban ai ïa u Bah MH Kharkrang na ka liang jong ki baroh arngut ki ong ba kin sa pan ïa ka rai na ki nongkyrshan ïa kaei ka sien jam kaba ki kwah.
“Nga la dei u nongtrei shitrhem ka party bad ngam kwah ruh ban ïaid pyrshah ïa ka rai ka party hynrei kan shong ha ki paidbah” ong u Bah Michael.
Shuh shuh na ka liang jongu la khot bïang ïa ki nongïalam ka BJP kiba la mih noh kibna kynthup naduh u Bah JA Lyngdoh bad kiwei pat ki nongïalam ban wan ai jingkyrshan ïa u kum u nongpan tiket na ka BJP khang ban pynjop don burom ïa u lada ka party ka ai tiket.