Shillong, Nailur, 22: Ka United Democratic Party (UDP) War Jaiñtia ka la phah da ka jingthoh sha u MLA ka Amlarem Constituency u Ma Lahkmen Rymbui uba long ruh u Myntri ka Sorkar Jylla ban tuklar lem ha kaba ïadei bad ka jingtyrwa jong ka Meghalaya Energy Corporation Limited (MeECL) ban aiti noh ïa ka jinglum ïa ka bai thang bording ha War Jaiñtia sha ka Kompeni.
Ka UDP lyngba u Chief Adviser u Bah K. Pohshna ha ka shithi ba la phah sha u Ma Rymbui ka la ong, “ka UDP War Jaiñtia ka la rai ban kyrshan ïa ka rai jong ka Synjuk ki Waheh Shnong War Jaintia kaba la pynlong da ka dorbar pyllun ha ka 15 tarik mynta u bnai ban kyrpad ïa phi ban pynsangeh bad ban ïakren bad ki bor jong ka Sorkar ban pynsangeh noh mardor ïa ka jingtyrwa jong ka MeECL ban aiti sha ka Kompeni na ka bynta ban lum ïa ka bai thang bording.”
“Ki paidbah ki la ai ka jingkyrshan kaba pura ba kin ym pat lah ban pdiang ban aiti kontrak sha ka Kompeni bad khamtam ka jingwanrah ïa u Smart Meter sha manla ki thliew iing namarba ngim pat lah ban sngewthuh shai shaphang ka jingtreikam jong une u tiar,” la ong ka UDP.
“Ka Amlarem Civil Sub-division ka dang shu ïoh thymmai ïa ka Sub-Division In-Charge MeECL ba pura kumta ngi dang kwah ban ïatreilang bad ka ophis jong ka MeECL khnang ba ngin sngewthuh bad ba ngin lah ban pynbeit ïa kino kino ki kam kiba ïadei bad ka Sub-division jong ngi namar ngi don shibun ki shnong kiba dang dei sha nongkyndong bad ki dang kwah ban pynneh da ka jingïatreilang bad ka MeECL,” la ong shuh shuh ka UDP.
“Na ka liang jong nga kum u nongïalam ka UDP bad kum u nongshong shnong nga la leit rung ha manla kawei pa kawei ka shnong bad ki paidbah jong ka War Jaintia Amlarem Sub Division ki la kyrpad ban ïakren ha ka jingïalang shaphang kane ka kam ha kaba kim pat lah satia ban pdiang ïa kane ka kam namarba ki dang pyntrei tang ha katno katne tylli ki Sub Division /Block. Ngi kwah ba ka Sorkar kan pyntrei hi kumba ju long tad haduh ba kan da lah ban pyntrei kyllum lang ha ka jylla baroh kawei,”la ong pynpaw u Chief Adviser jong ka UDP.
