Shillong, Nailur, 22: Ka sorkar ka la dep pyntreikam palat 2500 klur tyngka ka skhim Pradhan Mantri Gram Sadak Yojana (PMGSY) ha ka jylla, ïathuh u Symbud Myntri Rangbah uba dei peit ïa ka tnad PWD (Roads) u bah Prestone Tynsong.
“La dep pyntreikam ïa ka skhim PMGSY palat 2500 klur tyngka ha ka jylla bad la dep pynbiang ruh ïa ki Utilisation Certificate (UC). Kane ka mut ba ki jingpynbha ïaki surok ha ka jylla na kane ka skhim ka la palat ïa ka 2500 klur tyngka” ong u bah Prestone.
U la ïathuh ba mynta ka sorkar ka dang ap ïa ka jingmang tyngka ka sorkar pdeng na ka bynta ban pyntreikam pat ïa ka bynta ba lai jongkane ka skhim. Namar ka sorkar pdeng ka la dep kular ban ai sa kumba 1250 Km ka surok lyngba kane ka skhim ha ka jylla.
