Khliehriat Nailur 21: Ka Meghalaya People United Front (MPUF) East Jaiñtia Hills District, hapoh ka jingïalam u President, u bah Kyrshan Blah, u General Secretary sengkmie, u bah Aimon Syad lem bad ki dkhot, mynta ka sngi ki la leit ban buh biang da ka jingthoh ha khmat u myntri ka sorkar jylla u ba dei peit ïa ka tnat Transport, u bah Dasakhiat Lamare bad lyngba ka jingthoh ne dorkhas, ka seng ka la dawa biang ban buh ne thung ïa u Motor Vehicle Inspector (MVI) ha ka ophis jong ka District Transports ka East Jaiñtia Hills District, kane ka jingdawa jong ka seng ka dei ka jingdawa ka ba ym pat lah ban pynurlong haduh mynta.
U bah Kyrshan Blah, u la ong ba kumba long mynta la kumba shisnem tam ei ei ka East Jaiñtia District District kam don ïa u MVI bad kane ka pynsuki ïa rukom trei kam ka tnat DTO ha kaba ïadei bad ki kam na ka bynta ka jingdonkam ki paidbah ka district.
Na ka liang u General Secretary jong ka MPUF sengkmie, u bah Aimon Syad, u la ong ba hadien ka jingud jong ki paidbah ka District halor ka jingbym don u MVI, kumta na ka liang ka seng ka la dep ruh ban ai da ka jingthoh ban dawa na ka ophis jong u Commissioner of Transports Department, Shillong naduh ka 12.04.2022, hynrei haduh mynta kam pat shym la urlong satia, kumta mynta ka sngi ka seng kam banse ka la leit ban ïa kynduh ïa u myntri kane ka tnat, ha kaba naka liang u myntri ruh, u bah Dasakhiat u la kular ba un shim khia ïa kane ka kam namar ba ka dei hok hi ban don u MVI hapoh ka District.
Ka seng ka la pynpaw ka jingsngewnguh shibun ïa utei u myntri u ba la kular ban shim khia ïa kane ka kam ka ban long na ka bynta ka jingbit jingbiang ki paidbah jong ka district, khamtam ha kaba ïadei bad ki kot ki sla kiba ïadei bad ki kam kali.
