Maham ka JAC ïa ki trai par bad ïa ki kali ban ym siew khajna sha u Syiem Maharam
Mawkyrwat, ‘Nailur, 21: Ka Joint Action Committee (JAC) kaba kynthup ïa ki saw tylli ki sengbhalang jong ka Sawsymper Area kata naduh ka KSU, FKJGP, HYC bad HUAM mynta ka sngi ka 19 tarik u ‘Nailur, 2022 ki la buh ka jingmaham tyngeh ïa ki trai par bad ki kali, ba kim bit da lei lei ban siew ïa ka bai khajna sha u Syiem, kumjuh ruh ïa u nonglum khajna ba ym bit ban wan sha Raid Sawsymper.
Katei ka jingmaham ka mih hadien ba ka Joint Action Committee (JAC) kaba kynthup ïa kitei saw tylli ki sengbhalang jong ka Sawsymper Area ba da kaba mynsiem ba sngewkhia ki la leit ban jurip ïa kawei ka karkhana tylliat maw ha Umnongrim, Wahmawpat hadien ba ka ophis jong u Syiem ka Hima Maharam Syiemship ka la pynmih biang ïa kawei ka hukum ha ka 31 tarik u ‘Nailar, 2022 ban khrong khajna ïa ki kali kit maw hapoh ka Raid Sawsymper, East Khasi Hills District.
Ka JAC hapoh ka jingïalam Drimshon Marweiñ, Secretary JAC, u George Shangdiar uba dei President ka HYC, u Runningstar Kharbani, President ka FKJGP Saw-symper Circle ki la pynpaw ïa ka jingsngew-khia kaba jur ïa ka jingleh donbor ka ophis u Syiem Maharam ka bym shym la burom shuh ïa ka soskular kaba la ïateh da ki ‘riew rangbah ka Raid Sawsymper bad u Syiem Bamonsing ha u snem 1944 kaba ong, “ba u Syiem ka Hima Maharam u la lah ban synshar tang ïa ki khlieh briew katba ïa ka khyndew ka shyiap yn synshar hi da ka Raid Sawsymper”.
Kine ki nongïalam ki la ïathuh ruh ba na ka por sha ka por u Syiem u ju pynmih ïa ki hukum ban khrong khajna ïa baroh ki jingmih na ka Raid Sawsymper bad dei ha ka 15 tarik u Rymphang jong u snem 2021, na ka liang ka JAC ryngkat ki 15 tylli ki shnong jong ka Raid Sawsymper ki la mih paidbah ban pynlong da ka jingïa-ïaid paidbah kaba heh ha ban pyrshah ïa kane ka hukum u Syiem ha kato ka por. Hynrei tang hadien shisnem ha u 31 tarik u ‘Nailar, 2022 u Syiem u la pynmih biang sa ïa kawei ka hukum ban khrong khajna ïa ki kali kit maw hapoh ka Raid Sawsymper.
Ha kaba ïa dei bad kane ka bynta ka Joint Action Committee (JAC) ka la pynpaw ba kan pyrshah ïa kane ka hukum u Syiem bad kan ym pdiang da lei lei ruh em.