Shah weng kam shipor lai ngut ki nongtrei Jail, shah beh kam syndon ar ngut

Shillong/Jowai, Nailur 13: Hadien ka jingshahkem jong ki san ngut ki nongtrei ka Jowai District Jail ha ka sngi u Blei na ka daw ka jinglait pheit jong ki san ngut ki runar kiba dang don hapdeng ka jingshah tian bishar bad uwei u koidi, lai ngut ki nongtrei jong ka Phatok ki la shah weng kam shipor bad arngut kiwei pat ki la shah beh kam ha ka Lah Sngi u Blei mynta ka taiew.
Ki bor pynïaid jong ka Phatok ki la ong ha ka Lah Sngi u Blei, ïa u Rajesh Swer (Head Warder), u Pyndapbor Bamon (Warder) bad ïa u Chamilan Kynjing (Warder) la sospon shwa shipor na ka kam bad ïa ki arngut ki Temporary Warder kiba kynthup ïa u Damelahun Sunn bad ïa u Alexius Ïawram la weng syndon na ka kam.
Ka daw kaba la pynlong ïa kine ki nongtrei ka Phatok ban shah weng kam shipor bad ban shah behkam ka long namarba ki donkti ban ïasylla lang bad ki hynriew ngut kiba la lait phet na Phatok, la ong ki nongpeit ka phatok.
Ki dkhot jong ka Village Defence Party (VDP) ka shnong Barato ryngkat ki dkhot jong ka Hynñiewtrep Integrated Territorial Organisation (HITO) Barato Area Unit ha ka step sngi Baar ki la ïohkem ïa u Rikmenlang Lamare u koidi ba la lait phet na Jowai District Jail lem bad ki 5 ngut ki runar ba dang don hapdeng ka jingshah tian bishar ha ka sngi Saitjaiñ ka 10 tarik mynta u bnai.
Ïa une u koidi la ïoh kem na ka shnong Shaibnai, West Jaiñtia Hills District ha ka por 11:00 baje mynstep hapoh ka jingïalam jong u Secretary ka VDP Barato-B uba long ruh u President jong ka HITO Barato Area Unit ha ka jingsynran lang ki dkhot jong ka VDP ka Barato.
Ha kaba ïadei bad ka jingïoh kem ïa une u koidi ba la thwet jur da ki Pulit, na ka liang jong ki VDP ki la ai khublei ïa u Waheh Chnong bad ïa u Secretary Shnong kiba la ai jingtip ban leit kem ïa une u koidi u ba lait phet na Phatok bad ban aiti pat sha ki Pulit.
Kum ban shu pynkynmaw, san ngut ki runar ba dang don hapdeng ka jingshah tian bishar kiba kynthup ïa u I Love You Talang, u Lodestar Tang, Marsanki Tariang bad u Shidor Dkhar ki la shah bom ïap ha ki paidbhur ha ka sngi 11 tarik u Nailur
ha ka khlaw kaba don ha khappud jong shnong Muthlong bad Shangpung.
Katba ïa u Ramesh Dkhar la ïoh kem ha ka 12 tarik, Nailur na ka khlaw Muthlong bad Shangpung ïa uba la aiti noh sha ki Pulit.
Katkum ka jingïathuh jong ki nongïalam shnong ka shnong Moorap, ka Dorbar Shnong bad ka kur jong u I Love You Talang ki la kyntaid ban shimti ïa ka met u kaba dang don haduh mynta ha ka jaka buh met ïap ha Civil Hospital, Ïalong.