Haduh 1301 tylli ki kam ba thylli ha MPSC, kynnoh u CM ba dei ka khlam ba sahteng lut

Shillong, Nailur 13 : Ki la don haduh 1,301 tylli ki kam ba lait thylli ha ka Meghalaya Public Service Commission, ong u Myntri Rangbah ka Jylla, Conrad K Sangma ha Iing Dorbar da kaba pyntip ruh ba mynta ka jingpyndap ïa kitei ki kam ba lait thylli ka la ïaid shakhmat.
Ïa kane u Myntri Rangbah u la pyntip halor ka jingkylli ba wanrah da u MLA ka Mawlai, Bah PT Sawkmie da ka jingsngewkhia halor ka jingpynslem jong ka MPSC ban khot ïa ka interview na ka bynta ki samla wad kam.
“Ka kam ka la ïaid shakhmat ban pyndap ïa kitei ki kam ba thylli bad nga kular ruh ba ngi la trei mynta ban pyntikna ba ki eksam bad ki interview yn pynlong noh ha ki khyndiat por ban wan,” bynrap shuh shuh u Myntri Rangbah.
Halor ka jingkylli ba wanrah da u MLA ka Mawsynram, Bah HM Shangpliang ïa ka daw ka jingpynslem ban khot pynlong ïa ka eksam na ka bynta ki Enforcement Inspector kumjuh ruh ïa kiwei ki kam kiba dang lait thylli, u Myntri Rangbah u la pyntip ba ki don bun ki jingeh ba ki kynduh khamtam eh ha kine ki ar bad lai snem ba don ka khlam COVID.
“Kane ka la ktah shisha ïa ka MPSC ban pynlong ïa ki eksam ïa khun kam bad kumta ïa ki kam ba lait ym shym la lah ban pyndap. Ka don ruh ka hukum ka Iing Bishar haba ïadei bad ka jingpyntreikam ïa ka Roster System bad kumta ka tnad ka hap ban bud ïa ka bad haba ki leh kumta, ki hap ruh ban bud ïa katei ka rukom pynrung kam,” u la ong.
Na ka liang u Myntri Rangbah u la ong ruh ba ka sorkar jylla ka dang bishar mynta ïa ki lad ki lynti kumno ban pynbha bad pynthymmai ïa ka rukom treikam jong ka MPSC ha ka jylla.
“Hynrei, ngim pat lah ban shim rai namar kine ki donkam shwa ïa ka jingïatai bad ka jingïasyllok kaba sani,” u la ong.
Na ka liang u Myntri Rangbah u la pyntip ruh ba ki don bun tylli ki jingtyrwa kiba kynthup ban pyndonkam noh da ki kor ki bor bad ruh ban pynlong lang da kawei ka eksam na ka bynta baroh ki post kiba donkam kajuh ka kyrdan bad kajuh ka rukom siew nalor ban buh ruh khambun ki jaka thoh eksam. U ong ruh ba halor katei ka bynta ka sorkar ka dang bishar bniah mynta.
Nalorkata, u ong ruh ba ka don ka jingai jingmut ban don noh ruh wat da ka Meghalaya Combined Competitive Exam Rules.
“Ngi la dep ïa kren ïa kane ha ka kynhun myntri kaba dang shu dep ïa ka jingdonkam ban don noh da kawei ka eksam kaba long salonsar na bynta ki kam ba donkam kajuh ka kyrdan bad kajuh ka jingsiew namar ym ka ïarap ban ym pynlehohei ïa ka por. hynrei kum kine ki sienjam donkam pat ban leh bniah namar donkam ruh ban bud ïa ki kyndon ba la buh ba kan ym don ka jingïatyngkhuh,” u la ong da kaba bynrap ba ïa kane ki la phah biang sha ka tnad ban bishar bniah biang hadien ki jingpynkylla kiba ki tyrwa ha katei ka jingïakren.
U ong ruh ba ka sorkar jylla ka don ïa ka thong ban wanrah noh ka jingkylla kaba thymmai ha ka MPSC.