Shillong, Nailur 12 : U Lamphang ka ïing Dorbar Thawaiñ ka jylla u bah Metbah Lyngdoh ula maham da kaba tyngeh ban leh ei ei ïa u MLA ka Gambegre U Saleng A Sangma lada u dang kren da ki kyntien khor bad ba khlem akor hapoh ka ïing dorbar.
“ Nga la shim khia bha ïa kane ka jingleh jong u Saleng bad nga maham tygneh ba yn ai ka jingpynshitom ïa u lada u dang myllien ban kren biang kum kine ki jait ktien khlem akor hapoh ka ïing dorbar ha ka por jongka jingïatai nia” ong u Lamphang.
U Lamphang u la ong ba kane kam dei ka sien ba nyngkong ba une u MLA u ju kren da ki kyntien khlem akor hapoh ka ïing dorbar hynrei kaba la jia la bun bun sien bad hap beit ba weng ïaki kyntien jongu kumta lada u dang kren biang un ngat ha ka jingpynshitom kat kum ka rukom pynïaid ïa ka ïing dorbar.
U Lamphang u la ong “ Ka dei ka jingsngewkit khlieh jong ngi ban pynneh ïaka burom bad iktiar jongka ïing dorbar kaba la ïoh ïa ka burom naduh mynshwa haduh mynta da kaba kiar ban kren da ki kyntien khlem akor hapoh ka ïing dorbar ha ka por ba ïatai nia”.
