Shillong, Nailur 13: Hadien shisngi ba u Myntri Rangbah ka jyla u Conrad k Sangma u la ong ba u la kynnoh ba u Opossition Chief Wip uba dei ruh bu MLA na Umroi Constituency u Bah George B Lyngdoh ba u la thok bad ïalam bakla ïa ka ïing dorbar halor ka jingong ba ka sorkar jylla kam shym la syllok ne pan jingmut na ki paidbah shuwa ban soi ïa ka MoU pynbeit pun na ka liang ka Hynñiewtrep Integrated Terrestrial Organization(HITO) ha ka sngi Ba-ar ka la ong ba kane ka jingkam u Myntri Rangbah ka dei kaba bakla bad ka dei ruh u Myntri Rangbah ba thok ym satia u Bah George.
U Bah Donbok Dkhar u President ka HITO u la ong ba wat ïa ki seng bhalang kiba u Myntri Rangbah u la khot sha ka jingïalang ban ïakren halor ka jingpynbeit pud ka dei tang ka jingïalang pyndep rukom hynrei kam don satia kano kano ka jingphylliew jiongmut ha ka jingïalang kaba u khot.
“U Myntri Rangbah ha ka jingïalang bad ki kynhun seng bhalang u la shu ïathuh beit ïa kaei kaba u la leh khlem don kano kano ka jingpan jingmut na ngi. Ha u Myntri Rangbah mynjur ne ngim mynjur ïa kaei kaba u la leh halor kane ka kam na ka liang jong u tang ba u khot u la ong ba ngi ynjur beit” u la ong.
“Kato kaba u kynnoh thok ïa u Bah George ha ïing dorbar ka dei kaba bakla namar dei ma hi ba thok” u la bynrap.
U la ong ruh ba ka sorkar ha ka Wat ba nyngkong ka jingpynbeit pud ka sorkar kam shym la pan jingmut shuwa na ki trai jaka bad ka Distict Council, ha ka Wat kaba ar kum kane kam dei shuh ban jia u la ong.
“Lada phi peit halor ka Casino ruh u la thok namar la ong hana ban ym rah shuh ha ka jylla hynrei kaei kaba ngi ïohi ha ka jubab ha ïing dorbar ka long markhongpong na kata ka daw ka paw shai mano ba dei u men thok” u la ong shuh shuh.
Hab ïadei bad ka jingkam u myntri Rangbah ba ym lah shuh ban pynkylla ïa ka MoU pynbeit pud u Bah Donbok u la ong, “Wat ïa ka Riti Synshar ka ri dang lah ban pynkylla sa tang ka MoU lei ba lei ym lah”.
U Bah Donbok u la kynnoh ruh ba ka jingpynbeit pud hapdeng ka jylla Assam, bad Meghalaya kan dei beit tang na bynta ka jingmyntoi ka jylla Assam namar u Myntri Rangbah ka jylla jong ngi um don sur eiei ban kren namar u dei tang u Tynghung ne Puppet ka BJP.
