Shah thok ki nongïalam JAC ha u Myntri Rangbah, ïaid shaphrang ka jingtei ïa ka ktem khalai Casino ha Ri-Bhoi

Nongpoh, Nailur 13: Ki nongïalam ka Joint Action Committee (JAC) Against Casino Ri-Bhoi mynta ka sngi kila lum syndon da ka jingïalng ba kyrkieh ban pynpaw ka jingsngewsih kaba jur hadien ba ki nongïalam kila shah thok ha u Myntri Rangbah ha kaba ïadei bad ka jingtei ïaka ktem khalai (Casino) ha Ri-Bhoi District, hadien ba la iohi ïaka jubab na u James PK Sangma, Law Minister ha ka dorbar synrai bala buh jingkylli da u Bah George B Lyngdoh.
Na ka liang ki nongïalam ka JAC Against Casino naduh ki Rangbah Shnong bad ki kynhun Sengbhalang na ka them Ri-Bhoi kila pynpaw ka jingsngewkhia kaba jur halor ka jingkam u Myntri ka sorkar MDA u James PK Sangma ba ka ktem khalai kan nym don jingktah ïaki paidbah ka jylla bad kum ki nongïalam ka JAC kila kren shai ba da lei lei ruh kin nym pdiang satia ïaka kyndon aiñ bala wanrah da ka sorkar jylla bala tip kum ka Meghalaya Regulation of Gaming Act 2021.
Kum ban shu pynpaw halor ka jingkylli bala wanrah da u MLA ka Umroi u Bah George B Lyngdoh ha kaba ïadei bad ka ktem khalai kaba la thmu ban wanrah ha Ri-Bhoi, u James K Sangma u la kam ba kane ka jingkhalai Casino kam dei satia naka bynta ki nongshong shnong jong ka jylla Meghalaya, hynrei dei tang kiba nabar jylla kiba lah ban rung ha katei ka jaka, hynrei kan long pat ka jingmyntoi ïaki trai shnong haka iohkam iohjam, ban kyntiew ïaka ioh ka kot ka jylla hynrei naka liang ka JAC ka pynrem jur ïa katei ka jingkren jong u James Sangma.
Haba kren sha ki lad pathai khubor mynta ka sngi u Samla Ferdinald Kharkamni Secretary ka JAC u la pynpaw ba kum ka JAC kaba la thaw ban pyrshah ïa katei ka ktem khalai ka dap da ka jingsngewsih kaba khraw ban ioh jingtip bala dep ban ai license ba shipor (Temporary License) sha kito kiba kwah ban buh ktem khalai, wat hadien ba naka liang u Myntri Rangbah ka Jylla u Conrad Sangma u la kren shai bala pynsangeh noh ïaka ktem khalai ha Ri-Bhoi haka jingleit kynduh jong ki nongïalam dang shen, kaba long kum ka jingthok ïaki nongïalam ka JAC, bad ban tip ruh ba ka jingthmu jong ka sorkar ban wanrah ïaka ktem khalai ha Ri-Bhoi ka dang ïaid shaid shaid bad shaphrang kumba la paw shai haka jubab bala kren da u Myntri ka tnad Law u James K Sangma ha iing dorbar.
U la ong ruh ba naka liang ka JAC kam lah ban pdiang ïaka kyndon aiñ Meghalaya Regulation of Gaming Act 2021 namar la ithuh ïa katei ka kyndon haka por ba jur bha ka khlam Covid 19 khlem da pyndep bad bud ryntih ïaki kamram ba donkam khamtam ban pynsngewthuh sha ki paidbah, hynrei la shu wanrah ïa katei ka aiñ ban pynïahap pat bad ki jinglehkai tynrai jong ka jylla naduh ka siat khnam, ka jingïadur masi, ia puh syiar bad kiwei kiwei kiba la don naduh ki por ba mynshuwa.
Shuh shuh kum ka JAC ka la pynsngew ruh sha ka sorkar ba haka jaka ka ktem khalai ka Ri-Bhoi District ka donkam ïaki jaka pule ba bei pisa da ka sorkar, ki Medical College, ki jaka ban ai jinghikai sha ki khun samla ha kaba ïadei bad ka iohkam iohjam bad kiwei kiwei kiba long ka jingmyntoi bad ka jingkyrkhu ïaki khun samla, pynban la paw shai ba ka sorkar ka angnud ban wanrah ïa katei ka ktem khalai.
Halor katei ka bynta naka liang ka JAC kum ka jingpyrshah ïaka ktem khalai ha Ri Bhoi kan sa lum da ka jingïalang paidbah haka 23 tarik mynta u bnai naduh ka por 11 baje mynstep ha Nongpoh ryngkat ka jingïaid rally, bad kyrpad ruh ïaki 5 ngut ki MLA ka Ri-Bhoi ban poi ha katei ka sngi naka bynta ban ia thir bad tai sani, u la bynrap.