Na u DC dawa ka CoRP ban tuklar halor ka jingleh khlem akor ka kompani Jio ha Maawtari Myrdon

Nongpoh, Nailur 13: Ka Confederation of Ri-Bhoi People (CoRP) Central Zone kala pynpaw ka jingsngewkhia kaba jur halor ka jingleh khlem akor jong ka kompani Jio haka shnong Mawtari Myrdon kaba la pynlong ïaki paidbah katei ka thaiñ ban mad jingeh naka jingtwa khyndew.
Naka liang ka seng mynta ka sngi kala leit ruh ban phah da ka dorkhas sha u Deputy Commissioner ka Ri-Bhoi, hynrei um shym la treh ban ïakynduh kaba la pynlong pat ïaki ban leit aiti ïaka jingthoh sha ka Kong Balakyntiew Ranee ADC naka bynta ban tuklar ïa katei ka kam bad ka jingeh kaba ki paidbah ki mad ha katei ka thaiñ.
Kumba la pynpaw da u Bah Shining Kyntla President ka CoRP Central Zone u la ong katei ka jingtwa khyndew ha surok Mawtari Myrdon ba pynïasoh ruh ïa 4 tylli ki shnong ka dei namar ka jingtih thliew thep fiber jong ka kompani Jio kaba la pynlong pat ïaki paidbah mynta ban mad jingeh haka leit ka wan namar ka jingtwa khyndew.
Halor katei ka jingtwa khyndew naka liang ka seng kala dawa ruh na katei ka kompani Jio ban maramot mynta la kumba shibnai tam hynrei kam don satia ka dak ka shin ban shimkhia haduh mynta bala pynlong pat ïaki nongïalam ka seng ban leit ujor syndon sha u DC ka Ri-Bhoi ban tuklar ïa katei ka kam bad lada katei ka jingdawa kam urlong naka liang ka seng kala byrthen ban shim pat da kiwei ki sienjam.
Ha kawei ka bynta naka liang ka seng kala pynpaw ka jingsngewsih kaba jur halor ka jingkyntait jong u Deputy Commissioner ka Ri-Bhoi ban ïakynduh bad ki dkhot ka seng halor katei ka jingeh ba mad da ki paidbah kaba long kum ka jingibeiñ bad ka jingbym kheiñ snep ïaka seng.