Khih puk ka jylla na ka rai jong ka Cabinet ban pyntreikam ïa ka CPC bad CrPC

Shillong, Nailur 08: Shi sngi hadien ba ka Cabinet kala rai ban pyntreikam ïa ki Kyndon CrPC bad CPC ha baroh ki ïingbishar, ka jylla ka la khih puk mynta ka sngi, haba u CEM ka KHADC u Bah Titos Chyne, nangta ki MDC ka Congress u Bah Ronnie V. Lyngdoh bad u Bah PN Syiem bad kumjuh ruh ka Seng HYC bad u Bah VG Kynta, u Nongsaid aiñ ki la pynpaw ka jingpyrshah kaba jur ïa kane ka rai jong ka sorkar kaba ki pynpaw ba kan ktah shibun ïa ka bor treikam ki bor synshar trai ri khamtam ha kaba ïadei bad ka bishar ka khadar.
U Chief Executive Member ka KHADC, Bah Titos W Chyne u la ong ba ka la bha ban khang dam noh ïa ka District Council lada ka sorkar jylla ka ïaid shakhmat ban pyntreikam ïa ka CrPC bad ka CPC ha baroh kawei ka jylla khlem map.
“Lada ki ïaid shakhmat, ngan ong ïaphi ba kane ka rai ka la pyntlot noh ïa ka bor jongngi kaba mut la dei ban khang noh ïa ka District Council, la dei ban khangdam noh ïa ka District Council Court namar ymdon bor shuh,” ong u CEM haba kren ha ki lad pathai khubor.
Da kaba kubur ba ka long kaba donkam ïa ka sorkar ban ai bor ïa ki Judicial Magistrate ha ki District Court jong ki hynrei u la ong pat ba kim dei satia ban ktah ïa ka bor jong ka District Council kumba la ïa kren ha ka jingkynduh bad u Myntri Rangbah. U la ong ruh ba ha ka jingïakren ki la ïoh ruh ïa ka jingkular ba kan ym don satia ka jingktah ïa ki Kashari jong ka District Council hynrei katkum ka Notification pat ka long da kumwei.
“Katkum ka notification ka ong ba kan treikam ha baroh kawei ka jylla, kumta halor kane ka bynta na ka liang jongngi ngim sngewtynnad satia namar ka khlem kdew ba la pyllait ïa ka District Council,” u la bynrap biang.
Kumta, halor kane u la pyntip ba un sa lum ïa ka jingïalang bad ki MDC baroh ha kane ka sngi Nyngkong bad lada donkam ban kynduh biang ïa u Myntri Rangbah ka jylla. “Kumta nga phah ïa kane ka khubor sha ka sorkar jylla ba ka dei ban buhteng shwa ïa kane ka notification katba ngim pat ïa shai.”