Shillong, Nailur 08: Ka Dorbar Synrai jong ka jylla kan sdang ha ka 9 tarik u Nailur 2022 ha ka pot 10 baje mynstep.
Kane ka Dorbar ka lah ban ïohi ïa ka jingïakhluit ha kaba ïadei bad kiba bun ki mat ba la pynkhreh da ka Liang Pyrshah, kata ka Trinamool Congress. Ka daw ka long namar ba ka ladei artad sa ban long ka elekshon jied Nongmihkhmat kiba bun ki MLA ki lah ban wanrah ïa ki mat ïakren ha kane ka Dorbar ban pyni ba ki kren eiei hapoh ïingdorbar.
Hynrei ha kane ka sngi ba sdang ka Dorbar ka lah ban don ruh ka jingjia shabar jong ka ïingdorbar, namar ba ka kynhun “Ka Sur Ka Bri u Hynñiewtrep”, ka la rai ban pynlong ka jingïa ap paidbah hajan Civil Hospital halor ka Kaiphod ha kaba ïadei bad ka jingtohkit shah siat ïap u Bah Cherishterfield Thangkhiew ha ka 13 tarik u snem baladep.
Lah ban kdew hangne ba ha ka jingleit ïakynduh ki Nongïalam kane ka Kynhun ha kine ki bnai baladep ban dawa pynbna paidbah noh ïa kane ka Kaiphod jong u Nongbishar T. Vaiphei, u Bah Prestone Tynsong, Myntri Rangbah Symbud jong ka jylla, u la ong ba yn sa rah shuwa ha ïingdorbar jong ka jylla lyngba ka Dorbar Synrai kaban sdang ha ka 9 tarik mynta u bnai.
