Shillong, Nailur, 08: U Myntri Rangbah ka Jylla u Conrad Kongkal Sangma ha ka sngi Palei u la pyllait paidbah ïa ka Online Portal jong ka Meghalaya Residents Safety and Security Act (MRSSA) ïa kaba yn sa pyntreikam ha ki 7 tylli ki shnong hapoh ka nongbah Shillong ha ka wat kaba nyngkong bad kine ki shnong ki kynthup ïa ka shnong Nongrim Hills, Lapalang, Nongmynsong, Nongrah, Pohkseh, Riat Laban bad Wah Dienglieng.
Ha kajingpyllait paidbah ïa kane ka Portal, la sakhi lang da u Myntri ka tnat Kam Pohing u Bah Lahkmen Rymbui, u MLA jong ka Mawsynram u Bah Himalaya Shangpliang, u Chief Secretary ka Jylla u Bah Donald P. Wahlang, u Director General of Police u Dr. L.R. Bishnoi, ka Deputy Commissioner jong ka East Khasi Hills ka Kong Isawanda Laloo, u State Informatic Officer ka NIC u Bah Timothy Dkhar, ki heh ophissar bad ki rangbah shnong jong kine ki hynniew tylli ki shnong.
Haba kren ha kane ka jingïalang u Myntri Rangbah u la ong ba ka jingpyntreikam ïa ka Digitised System ym tang ba kan buh ïa ki nongshong shnong ha ka jingshngaiñ hynrei kan long ruh kum ka jinglum jingtip na ka bynta ki bor synshar ki ban sa peitngor bad ban sa pyntreikam ïa ki jingtip ba la ïoh lum na ka Online Database.
U la bynrap ba ka jingpyntreikam ïa ka MRSSA da ki kor ki bor ka juk mynta kan ïarap ban peitngor bad ban pyntreikam ïa kiwei de ki kam bad ki prokram jong ka Sorkar.
U la ong shuh shuh ba kane ka thong kan pynïasoh palat 6000 hajar tylli ki shnong ha ka jylla sha ka Online System.
Ïa ka Digitised Database yn sa pyntreikam na ka bynta ban ai jingïarap ha ki shnong kiba kham jynjar ha ka koit ka khiah. U la ong ruh ba ka Digitisation kan ïarap ïa ka Sorkar ban peitngor ïa ka jingïaid beit shakhmat ki skhim bad ki prokram jong ka Sorkar.
U Myntri Rangbah u la ong ha kaba sdang jong ka Online System yn kdup tang ïa ki shnong kiba don ha Sor bad suki suki yn sa pynïar ïa ka jingtreikam sha ka jylla ha ki wat kiba hadien.
U Myntri Rangbah u la ïaroh ruh ïa ka jingtrei shitom jong ki Rangbah Shnong ha ki shnong bapher bapher kiba la ïatreilang ryngkat bad ki bor synshar ban pyntreikam pura ïa kane ka thong.
U Myntri ka tnat Kam Pohing u Bah Lahkmen Rymbui u la ong ba ka shongsuk shongsaiñ bad ka jingshngaiñ jong ki paidbah ka dei ka thong kaba hakhmat eh jong ka Sorkar bad u la ïaroh ruh ïa ki lad ki lynti ba ki Dorbar Shnong ki la shim ban ïada ïa ki paidbah ha ki shnong ki thaw.
Ka Sorkar Meghalaya ka la pyntreikam ïa ka Meghalaya Resident Safety & Security Act 2016 da ka jingthmu ban ïada ïa ki nongshong shnong ka jylla da kaba bishar bniah bin pa bin ïa ki nongshong wai kiba wan sah hapoh ka Jylla.
Ka jingpyntreikam ïa kane ka Aiñ kan ïada na ki nongleh kam sniew ban ïoh jaka rieh hapoh ka jylla bad ban tehlakam ruh ïa ka jingwan rung kyrthep jong ki mynder ri kiba lah ban wan rung bad rieh tngen ha ki shnong ki thaw.
Khnang ban pyntreikam pura ïa kane ka Aiñ, ka Sorkar da ka jingïatreilang bad ka NIC Meghalaya ka la shim ïa ki sienjam ban shna pynwandur ïa ka Online Application ka ban pynsuk ïa ki nongshong shnong (trai iing/nongshong wai) ban pynrung kyrteng ïalade da kaba ïoh shaa ïa ka jingpynshisha na ki bor synshar shnong.
Ïa ka web application la shna pynwandur ha kata ka rukom ba ki trai iing, ki nongshong shnong, ki bor synshar jong ki shnong ki thaw kin dup lah ban pynrung ïa ki jingtip bapura jong ki nongshong shnong (kata, ki trai ing/ nongshong wai) katkum ki kyndon ba la kdew ha ka Form B jong ka Aiñ.
Ïa ka URL jong ka web application is http://megrssa.nic.in lah ban peit ruh lyngba ki computer, laptop, tablet, bad smartphone.
Ki kyndon ba la bthah ban pyndap lyngba ka online system ki long ka EPIC jong u trai iing, ka EPIC, ka Driving license, ka PAN, ka AADHAAR, ka Student ID, ka Passport No. bad kiwei kiwei jong ki jong ki nongshong wai.
