Shillong, Nailur 08: Ka Hynñiewtrep Integrated Territorial Organization (HITO) ha ka sngi Palei ki la leit ban aiti ïa ka dorkhas sha u President ka BJP, Meghalaya u Bah Earnest Mawrie ba un pynpoi sha u Myntri Rangbahduh ka ri U Narendra Modi ba ka sorkar pdeng ka dei ban aiti noh sha ka kynhun tohkit laitluid la ka CBI ne Enforcement Directorate (ED) ba kan shimti ban tohkit halor kiba bun bah ki jyrsieh bamsap kiba paw ha ka jylla.
Haba kren bad ki lad pathai khubor hadien ba mih na ka ophis u President ka BJP, U Bah Donbok Dkhar u la ong ba ka jingtohkit kaba ki kwah ba ka CBI kan shimti ne a ED ka dei halor kiba bun bah ki kam bamsap ba kynthup ïa khaïi tuh dewïong, ka kam thung kam tuh da kaba tah sia lieh ïa ki nonghikai, ka bamsap ha ka tnad social welfare Department halor ki khaw rashon, ka bamsap ha ka skhim Saubhagya, ka bamsap ban tei ïa ka ISBT, ka bamsap ban tei ïa ka Assembly building kaba thymmai, ka bamsap ha kaban pyntrei ïa ka pisa ha ki District Council, ka bamsap ban buh smart Meter, bad kiwei kiwei de ki kam bamsap kiba ym lah jer shuh kiba jia ha ka sokar ba mynta bad barim ruh.
U la ong ruh ba ka bamsap khaïi dewïong kaba la paw tyngkreiñ ha kaba ka la don ruh ka jingduh ei ka mynsiem briew kum u OC ka Patharkhmah PS, u nongïalam ka JYF, ka jingshah shoh shah tied ki nongïalam ka CSWO bad kiwei kiwei ki jingjia kiba ym shym pat la paw pyrthei mano ba donkti ha kane ka kam.
“Ngi la pynkhreh ka kaiphot kaba paka halor ka kam bamsap bad kam donkam shuh ban dang pynkhreh bad na ka laing ka BJP Meghalya ka la kular ba kan shimkhia ïa kane ka kam ban ban pynpoi ïa ka shithi bad ban ïakren bad ki myntri ka sorkar pdeng” ong u Bah Donbok.
U la ong ruh ba na ka liang jong ka seng ka ai por shitaiew ïa ka BJP ba kan leh ïa kaba donkam bad lada kam poi shaei shaei kan shim da kiwei ki sienjam wat ban leit kynduh ïa ki heh jong ka ministry of Home Affair.
“Ngin peit la ka BJP kan leh da ka kam hadien ba ngi la aiti ka kaiphot ba paka ne kan long tang kum u pyrthat rkhiang khlem slap” u la ong
