Shillong, Nailur, 08: U nongthoh khubor u Bah Starfing Pdahkasiej u la pynmih sa kawei ka kot Khasi kum shi bynta ka jingïaleh jong u ban pynphriang jingtip kham bniah halor u pud u sam jong ka jylla Meghalaya.
La pyllait paidbah ïa kane ka kot kaba la jer, “Meghalaya Boundary, Based on the North Eastern Areas (Reorganization) Act, 1971” da u Senior Advocate ka Iingbishar ka Meghalaya High Court u Bah VGK Kynta ha ka jingïalang ka ba la long ha Shillong Press Club ha ka sngi Palei.
Ha kane ka sngi, la sakhi lang dau President jong ka Shillong Press Club u Bah David Oliver Laitphlang, u President jong ka Meghalaya Editor and Publisher’s Association u Bah Monarch Shabong, ki nongthoh khubor bad kiwei de kiba la shah khot sngewbha.
Lah ban kdew ba ha ka jingïaid lynti kum u nongthoh khubor, u Bah Starfing Pdahkasiej u la pynmih ruh ïa kiwei kiwei de ki kot.
Da ka jingtrei shitom u la lah ban pynmih ïa kane ka kot kaba la pyntip shaphang u pud u sam jong ka Jylla Meghalaya.
