Ban kren halor ka ‘Reservation Policy’, phah shithi u bah P.S. Lyngdoh sha ki 36 ngut ki MLA

Mawkyrwat, ‘Nailur 08: U bah P.S. Lyngdoh, uwei na ki samla rangbah jong ka dong ka thaiñ Phlangdiloiñ da ka jingsngewkhia u la phah syndon da ka shithi sha ki 36 ngut ki Member jong ka Legislative Assembly jong ka Meghalaya kiba dei nongmihkhmat khasi ban kyrpad ïa ki ban kren ei ei na ka bynta ka lawei jong ki samla ka Jaidbynriew, ha kaba ïa dei bad ka ‘Reservation Policy’ hapoh ka jylla Meghalaya.
Ha ka shithi ba u la phah, u bah P.S. Lyngdoh uba don jingkitkhlieh ïa ka jaidbynriew u la ong ba khnang ban pynpoi kane ka jingkyrpad sha baroh ki nongialam bad nongmihkhmat nangne napoh ka Ri Khasi kiba hapoh ka jylla jong ngi ba hadien ka jingïatwad jingmut lyngba ki para samla bad ki nongshong shnong hapoh ka Jaidbynriew ma ki ki don hapdeng ka jingduh jingkyrmen haba phai ïa ka lawei ki samla jong ki samla naba ki don hangne hapoh ka jylla bad ka ithuh ïa ngi kum ki khasi kaba mut (Khynriam u Pnar, u Bhoi, u War, ki Maram, ki Lyngngam, ngi ki paidbah khasi ba ïar) hynrei naduh ki mynnor ngi lah shah phiah lyngba ka ‘political division’ bad watla ngi long kajuh ka snam ki khun u hynñiewtrep hynrei ha ka ‘political division’ ïa ngi lah phiah ha ki ar bynta kata “Khasi & Jaiñtia”.
U la ong ruh ba kumba la tip hapoh ka Jylla Meghalaya jong ngi ngi don Khasi, Jaiñtia & Garo hynrei haba phai pat sha ka bhah ïoh kam ïoh jam, ka bhah ban ïoh leit pule lyngba ka bhah ‘seats government’ (Reservation Policy) ïa ngi ki khasi la shah khñiot bad kam shym long ïa ryngkat satia hapdeng jong ngi ki Khasi, Jaiñtia bad Garo kata ka long 20% ïa ki Khasi, 20% ïa ki Jaiñtia bad 40% ïa ki Garo bad lada ngi phai katkum ka jingdon briew ruh ngi don malu mala kumba 18 lakh tam, ki Garo pat 9 lakh tam hynrei katba ha kane ka kam ïoh bhah, kam shym don ka jingïaryngkat la 50 snem mynta hynrei ym shym don satia ba ïa ban pynbeit ne pynïoh lang ïa ngi ka jingïalong ryntih hapoh ka jylla bad kum ki samla ka jylla ki pynpaw ïa ka jingsngewdiaw haba ki ïohi pylleiñ pylleiñ ïa kum kine ki jingleh shiliang khmat ka sorkar Meghalaya ïa ngi ki paidbah ki khun u hynñiewtrep.
Namarkata, da kaba burom u buh ka jingkyrpad sngewrit ïa ki Nongmihkhmat ban shimkhia ïa kane bad tuklar ïa kane ban ai ka jingkyrshan bad kren ei ei ha Assembly halor kane ka mat bad lada ymdei ma ki ban ïarap ne bah khlieh ban pynbeit lem ïa kane, mano pat ban ïarap ïa ngi ki khun Khasi bad hato phi hun mo ba kiwei ki ïoh tam bad ngi ngin ïoh duna haba ngi dei na kajuh ka jylla?? u la buh jingkylli bad namarkata, sngewbha u buh ka jingkyrpad ba kum ki nongmihkhmat kin rah ruh ïa kane ha Ïingdorbar bad ai ka jingkyrshan. “Ïa kane ka shithi nga phah sha baroh ki nongmihkhmat nangne napoh ka ri Khasi kaba mut ki 36 ngut ki nongmihkhmat bad nga don ka jingkyrmen bad ka jingshaniah ba skhem ba kin shim ïa kane kum kawei na ki mat ba kordor tam na bynta ka lawei ki khun samla hapoh ki konstitwensi jong phi hangne ha ka Jaidbynriew”, ong u bah P.S. Lyngdoh.
U bah P.S. Lyngdoh u la ban ba ki la don katto katne ki Nongmihkhmat ne ki MLA hapoh ka ri Khasi ki la pynpaw ka jingsngew mynjur ban ai ka jingkyrshan halor kane ka ‘Reservation Policy’. Kumta u la kyrpad ba kiwei de ki nongmihkhmat jong ka Ri Khasi kin kren ei ei ha kane ha ka Dorbar Synrai ka ban sa long hapoh jong ka Assembly ban pyntikna ba kita ki 36 ngut ki ba don ka jingkitkhlieh ïa ka jaidbynriew.