Hadien 70 snem yn ïoh ki khun Khasi Khara ïa ka aiñ khyndew ba pura

Shillong, Nailur 06: Ha ka sien kaba nyngkong eh naduh ba la thaw ïa ka District Council ha u snem 1952, ki paid Khasi Khara kin ïoh ïa ka aiñ bat khyndew kaba pura, ha kaba ïa ki dulir ba ai da ka KHADC lyngba ki Hima bad ki Dorbar Shnong yn ithuh noh da ki Bank bad ki bor sorkar.
Nalorkata ruh ki briew ki bym don jaka ban shna ïing shna sem kin ïoh jaka ban shna ïing.
“Ka long ka sngi ban sah kynmaw ïa ka jaidbynriew ha kaba u Lat u la ai jingmynjur ïa ka KHADC Regulations and Administration of Land Bill, 2021”, la ong u Bah Titos Chyne, CEM jong ka KHADC, haba ïakren bad ki Nongthoh khubor mynta ka sngi.
U Bah Titos, u la ong ba hadien jong kane ka jingmynjur jong u Lat, na ka liang ka KHADC kan pynsted ban shna noh ïa ki Rule ne ki Kyndon ha shuwa ban pyntreikam pura ïa kane ka Aiñ.
Hynrei wat lada ym pat shna ïa ki Kyndon, ka jingthmu ba kongsan jong kaned ka aiñ ka long ban pynlong aiñ noh ïa ki dulir ne ki kot khyndew ba ai da ki Dorbar Shnong, ki Hima ryngkat ka jingmynjur jong ka District Council. “Lyngba kane ka aiñ, ki bor sorkar, ki Bank ki hap ban ithuh ïa ki dulir khyndew jong ka KHADC”, u la ong.
Nalorkata u la ong ba lyngba kane ka aiñ kin don ruh ki Land Bank ne ki jaka ne khyndew ha kaba ki paidbah ki bym don jaka kiba kwah ban shna ïing, ki lah ban ïoh jaka ban shna ïing.
Haba la kylli ba hadien kane ka jingtreikam ïa kane ka aiñ, ki paidbah ki donkam ne em ban rejistar ïa ki jaka jong ki, u Bah Titos, u la ong ba kane kan shong ha ki paidbah la ki kwah ban rejistar bad ka District Council ne bad ka sorkar. Hynrei ka jingïapher ka long ba ka District Council ka rejistar ïa ki jaka katba ka sorkar pat ka rejistar tang ïa ki dulir.
Shuh shuh lyngba kane ka aiñ, u CEM, u la ong ba kan don ka jingpynbeit ryntih ha kaba ïadei bad ka jingoh dor ki Nongïalam Shnong ha ka por ba ïadie ïathied khyndew. “Mynta ki Nongïalam Shnong kin nym lah shuh ban leh ne shim katba mon, hynrei ki kyndon ka KHADC kin buh ryntih ïa kane”, u la ong.
”ïa kane ka Land Bill la wanrah nyngkong ha ka snem 2012 por ba long CEM u Bah PN Syiem, hynrei ka sorkar ka la pynphai biang. Nangta la wanrah biang ha ka snem 2014 por ba long CEM u Bah Ardent Basaïawmoit, hynrei ka la shah pynphai biang. Hadien kane la rah biang ha ka por ba long CEM u Bah Teiñwell Dkhar bad u Bah Titos u long kum u EM ka Land. Hynrei ka la shah pynphai biang. Ha ka snem 2021 haba u Bah Titos u la shimti kum u CEM la phah biang ïa kane ka Bill hadien ki jingpynbit pynbiang da kaba bud dien bha ïa ki rukom bat khyndew. Bad dei ha kane ka EC ba u Lat ka jylla u la ai syndon ïa ka jingmynjur.