Tura, Nailur, 06: Ka Trinamool Congress ha ka sngi Baar ka la takraiñ ïa ka Sorkar Meghalaya Democratic Alliance (MDA) hapoh ka jingïalam jong u Conrad Kongkal Sangma kum u Myntri Rangbah ba kam dei ban shu shim burom sha lade ïa ki kam kiba la pynsdang da u Myntri Rangbah barim ka Jylla u Dr. Mukul Sangma.
Haba kynthoh ïa ka jingbym shimkhia jong ka Sorkar MDA ïa ki kynthei, u MLA jong ka TMC u Zenith Sangma haba kren ha ka jingïalang kaba la long ha Gambegre, West Garo Hills u la ong, “dei u Dr. Mukul Sangma uba la pynsdang nyngkong eh ban ai jingïarap T. 5,000 kum ka ‘allowance’ sha ki kynthei ba kin dup lah ban kyrshan ïa la ka jong ka ing ka sem; hynrei u Conrad Sangma khlem da pyrkhat ula pynkut noh ïa kane ka skhim.”
“Ha Ingdorbar Thawaiñ, bun tylli ki jingkylli la buh jingkylli shaphang ka pisa jong ka JICA bad ka World Bank ïa kaba la pyndonkam bakla da kane ka Sorkar ka bym pat lah ban ai jubab satia haduh mynta. Mynta, shwa ka elekshon, ka Sorkar MDA da kane ka juh ka pisa ka la ai kum ka FOCUS scheme, ïa kaba la ai sha manla kawei pa kawei ka longing T.5000 hajar. Kynmaw ba ka pisa kam dei satia ka jong ka NPP hynrei dei kaba wan na ka Sorkar Pdeng. Ka dei ka pisa kaba la siew da ki nongsiew khajna hynrei ym da ka NPP,” la kynthoh u Sangma.
Da kaba kynthoh ïa ka jingmlien jong ka Sorkar MDA ban iehnoh ïa ki skhim shiteng lynti, u Sangma la ong, “ha ka samoi ba dang long Myntri Rangbah u Dr. Mukul u la wanrah ïa ka Chief Minister’s Social Assistance Programme ka bym shym la ai jingïarap na ka Sorkar Pdeng hynrei da ka sorkar jylla. Ka Sorkar MDA ka la iehnoh ïa kane ka skhim.”
Ka MDA ka Sadhiarani Sangma, haba kren ha kane ka jingïalang ka la pynrem ïa ka jingbym don jingkhlieh jong ka Sorkar MDA ban weng ïa ka jingeh jong ki nonghikai ka Jylla.
“Ka Sorkar MDA ba ïalam da ka NPP ka la shukor ïa ngi mynta la saw snem tam. Kim shym la wanrah wat tang kawei ruh ka kam pynroi hapoh ka jylla, khamtam ha ka shnong Gambegre,” la kynnoh kane ka MDC.
Ha kane ka jingïalang, la ïadonlang kiwei pat ki MLA jong ka TMC kiba kynthup ïa ka Dikkanchi D. Shira, u Lazarus M. Sangma, u Winnerson D Sangma bad ki MDC ba kynthup ïa u Cherak W. Momin, u Nehru D. Sangma bad ka Sadhiarani M Sangma.
