Ban pyntreikam ïa ka hukum ka ïingbishar HC yn pynïaid noh ka Sorkar ïa ki bus skul

Shillong, Nailur 4 : Khnang ban pyntreikam ïa ka hukum jongka ïing bishar High Court jongka jylla kumno ban thaw lad ban kham pynduna ïa ka jingdheng kali ha kane ka nongbah Shillong, ka sorkar ka la rai mynta ban pyntreikam ne pynïaid noh da ki Bus Skul ban leit on bad leit shaw ïa ki khynnah skul na ki skul bapher bapher hapoh kane ka nongbah.
Haba ïakren bad ki nongthoh khubor u Myntri ka tnad Pule Puthi uba dei ruh u Myntri Kam Pohïing ka jylla u ma Lahkmen Rymbui ul a ong “ Ka sorkar ka dang pynkhreh mynta ban pyntreikam ne pynïaid noh da ki bus skul ban kham pynduna ïa kane ka jingkhapngiah bad jingdheng kali ha kane ka nongbah Shillong”.
ïa kane ka sorkar kala rai ban pynïaid shakhmat hadien ba ki kmie ki kpa ruh ki la mynjur ban ïatrei lang ban phah skul noh ïa ki khun da ki bus kaba long kum shi bynta ban pynduna ïa ka jingdheng kali ha kane ka nongbah.
Ha ka jubab ba ka sorkar ka la ai sha ka ïing bishar High Court jongka jylla ha ka 17 tarik Nailar 2022 la pyntip, hadien ba la ïakren bad ïa pynbeit bad kiba bun ki skul bad kumba 82 % ki kmie ki kpa ruh ki ai ka jingkyrshan ban phah skul noh ïa ki khun da ki bus ban pynbiang da ka sorkar kumta la rai ban sdang pynïaid noh shen ïa kine ki bus.
Na ka liang u nongujor mukotduma PIL u la pynpaw ba ki bor sorkar ki dei ban shim khia ban pynduna ka jingwan buh skul da ki kali shimet namar lada tang uwei u khynnah skul hap wan kawei ka kali katno kane kan wanrah ïa ka jingdheng kali kaba jur bha. U ma Lahkmen u la ïathuh ruh ba la thaw ïa ka society ka ban peit bad pynïaid ïa kine ki bus. Ha kaba nyngkong ka sorkar kan sdang shwa ban pynïaid 50 haduh 60 tylli ki bus bad lada dang i donkam lehse kan sa thied shuh shuh kham hadien.
Na ka liang u Myntri ula ïathuh ba ka jingwad jaka ban pynïeng ïa ki bus hadien ba la dep pynhiar ïa ki khynnah skul ruh ka dang bteng mynta khnang ba kine kin ym hap ïaid kylleng hynrei ban ïoh ïeng shajan hi ki skul ba ki leit buh ïa ki khynnah bad hap ban shaw biang ïa ki.
“ Ngi dang wad jaka hangno ban pynïeng ïa kine ki bus namar kiba bun ki skul kim don ki jaka ba heh ban pynïeng ïa ki bus. ïa kito kiba don jaka pynïeng hapoh phyllaw hadien bala dep pynhiar yn pynïeng hi hapoh phyllaw jong ki skul hynrei ïa kito ki bym don hap wad jaka ba kin ïeng bad ïa kane ki briew ka sorkar ki dang leh ïa kaba dei ban leh” ong u ma Lahkmen.
U ma Lahkmen ula ong “ Wat u Myntri Rangbah u Conrad K Sangma ruh u la dep pyntip ïa kane hapoh ka Dorbar Mang Tyngka. Nga tharai hadien ba ngi la lah ban pynïaid ïa ki bus kane kan sa long kawei na ki lad ban pynduna ïa ka jingdheng kali ha kane ka nongbah namar ka jingdheng kali ka jur eh ha ka por ba leit on bad leit shaw skul”.
Ka sorkar ka la pyntip ruh ba ka la buh ka jingtyrwa sha ka World Bank na ka bynta ban bei pisa ban pynïaid ïa ki bus elektrik ha kane ka jylla namar kane kan pynduna ruh ïa ka tdem ha kane ka nongbah.