Jan 1 lak marwei ïoh ki Nongaibuit jong u CM, tang ka bai pynbha ïing ruh 2 lak

Shillong, Nailur 02: Ka Meghalaya, wat hapdeng ka jingkyrduh pisa tang ban siew tulop ïa ki nonghikai bad ki nongshet ja sngi ha ki skul, pynban ka long kaei kaei kaba ym lah ban mutdur ba ka don da ki phew phew ngut ki Chairman ha ki tnad treikam bapher bapher kum ki Corporation, ki Board bad kiwei kiwei.
Ka RTI ba la ïoh lum dang shen na ki tnad treikam bapher bapher jong ka sorkar, ka pyni ba ka sorkar ka pynlut da ki phew lak bad ki klur tyngka na ka bynta ka jingsiew sha kine ki Chairman, ki Co- Chairman, Ki Deputy Chairman, ki Adviser, kiba bun na ki, kidei ki Ex- MLA lane ki nongtrei jong ki Party, ym kita ki expert.
Ha kane ka RTI ba la ïoh la pynpaw ba nalor u Dr. DD Lapang uba long u Chief Adviser sha ka sorkar, tang ki Adviser jong u Myntri Rangbah, u Conrad Sangma ki don haduh 7 ngut. Kine ki long u Bah Donkupar War, u Political Adviser, u Thomas Sangma, MLA, u Bah Alexander Hek, MLA, u Bah Lambor Malngiang, MLA, u Bah Gigur Myrthong MLA bad u Bah Ernest Mawrie, President ka BJP kiba long ki Adviser jong u Myntri Rangbah.
Nangta la thung ruh ïa ka Arlene Sangma, MLA kaba long ka Political Adviser bad Secretary jong u Myntri Rangbah.
Katkum ka jubab ba la ai halor kane ka jingwad jingtip da ka RTI, ka jingsiew sha kine ki 7 ngut ka long kumne.
Ka Honorarium 20,000 tyngka shi bnai. Ka Hospitality T. 8500 shi bnai, ka bai wai ïing lada kim ïoh quarter na ka sorkar ka long T.20,000 shi bnai, ka bai sumar bai dawai lait ei beit, bai wai kali lada ym ïoh kali sorkar ka long T. 600 shi sngi, bai ding elektrik T.5000 shi bnai, bai petrol lada ïoh da ka kali sorkar ka long 250 litar shi bnai bad ka mobil 4 litar.
Ym tang kine ki jingsiew ba kine ki 7 ngut ki ïoh, ki ïoh 2 lak tyngka ka bai pynbha ïing ba ai tang shisien ai, bai shuki bai miej (furtuniture) T.40,000 shi snem, ka telephone kawei ha ïing kawei ha ophis. Nangta ka TA/DA ka ïaryngkat bad u ophisar Grade 1. Ka bai leit bai wan shabar jylla ka long tang lada ki leit jingleit ban ïashim bynta ha ki Komiti bad hadien ka jingmynjur u Myntri Rangbah lane u Myntri ba dei peit ïa ka tnad treikam jong ki.
Nalor kine kine ki Nongaibuit jong u Myntri Rangbah na ka liang ka sorkar ka siew tulop ruh ïa uwei u Steno Grade I ne Grade II. Nangta uwei u SA, uwei u PA, uwei u Typist, 2 ngut ki Driver, nangta ki nongtrei Grade IV ha ophis katkum ka jingdonkam bad ha ïing pat ki ïoh 5 ngut ki nongtrei Grade IV.
Lada kheiñ ïa kine ki jingsiew ne ki jinglut jong kine ki Adviser jong u CM, khlem pat kheiñ ïa ka bai dawai ne bai sumar jong ki, nangta lait noh ka bai pynbha ïa ka ïing ne ïa ka tulop jong ki nongtrei Grade IV bad Driver bad khlem pat kheiñ ruh ïa ka bai leit jingleit jong ki shabar, lada ki leit, ka jinglut ka long kumba 1 lak tyngka eiei.
Na ka bynta kiba long MLA kane kadei ka jingsiew kaba ki ïoh tang na ka sorkar lyngba ka Finance Department. Hynrei katkum ka jingïathuh ki MLA, kine ki Adviser ne ki Chairman ne Co- Chairman kiba dei ki MLA, ka tulop MLA ki ïoh la ka jong, kata na Assembly. Katkum ka jingtip ba la ïoh la sngewthuh ba ka tulop ki MLA mynta ka long kumba 2 lak tyngka.
Kumta lada shu kheiñ kyllum na ka bynta kito kiba long MLA bad Adviser ka jingïoh jong ki tang na ka tullop bad ki jingsiew na ka sorkar kan nym duna ïa ka 3 lak tyngka shi bnai.
Ki Adviser kiba long MLA hangne ki long u Bah AL Hek, u Bah Lambor Malngiang, u Bah Gigur Myrthong bad ka Arlene Sangma.