Pyntip kiei kita ki “ High Level” ba khaïi dewiong beaiñ ban ïoh phah kem ka sorkar : Dy CM

Shillong, Nailur 2 : Pyntip kiei kita ki “High Level” kiba ïadon kti ban khaïi dewiong beaiñ ha ka jylla khnang ba ka sorkar kan ïoh ban phah kem ïa ki namar la shu ïoh sngew ïa kata ka kyntien High Level tang ha ki ïew ki hat bad ha ki lad pathai khubor. Namar ban shu kynnoh ba kita ki high level kam don jingmut haba kynnoh pyntip bad sei ruh bad ki kyrteng khnang ba ka sorkar kan ioh ban leh ia kaba donkam kat kum ka aiñ, ong u Symbud Myntri Rangbah bah Prestone Tynsong.
Haba kren bad ki lad pathai khubor mynta ka Sngi Thohdieng u la ong “ Ngam sngewthuh shuh kiei kita ki High Level, nga ruh nga shu ïoh jingtip na ki lad pathai khubor bad ki lad pathai khubor ki dei ban wad bniah ïa ka kyrteng kita ki High Level khnang ba ka sorkar kan ïoh ban phah kem ïa ki kat kum ki kyndon jongka aiñ.
“ Sngewbha ki paidbah ne kino kino kiba kynnoh halor kita ki high level ba kin sei madan ïaki kyrteng jongki namar ka sorkar kam shah da lei ruh ban ïa sylla bad pynïaid ïa ki trok ba kit palat 40 haduh 50 matric ton na jingkieng Dam ne ban ïa khaïi dewiong beaiñ wat na kiwei kiwei ki surok ruh” ong biang u Symbud Myntri Rangbah.
U Symbud Myntri Rangbah ula kren ïa kane halor ka jingkylli hato ka long kaba shisha ba kat haduh mynta ki dang don beit ki trok ba kit palat pud kiba ïaid nalor ka jingkieng Dam tang na ka daw ba ïadon kti kita ki High Level. “ Haba phi kynnoh halor kita ki High Level sngewbha ruh ban pynshisha da ki kyrteng khnang ba ka sorkar kan ïoh ban leh ïa kaba donkam kat kum ki kyndon aiñ” ong u bah Pretone.
U la ïathuh kumba long mynta ka tnad Transport ka la buh da ki Enforcement Inspector lem badki bor pulit ban peit ïa ka ïaid ka ïeng ki trok bad ban bat ïa kino kino kiba kit palat ïa ka 20 ton kata kynthup ïa ka jingkhia ka trok ne kali. U la ong ba ki trok kiba kit palat ïa ka 20 ton ym shah satia ban ïaid namar ïoh ka ktah ia katei ka jingkieng.
Kumba long mynta ka sorjamin ka dang ïaid na ka bynta ba sharum jongka jingkieng ban tei ia ka jingkieng bat hymmai bad ban pynïaid ïa ka surok na katei ka jingkieng ba thymmai ka ban mih sha Industrial Estate bad nangta ka ban poi shajan ka jingkieng Umiam Police Station bad Fire Brigade.
“Ngi la aiti ha ki nong saiñdur ïa ka jingkieng ban sorjamin bad ha ka jingshisha kila dep ïathuh da ka ktien ba ki la lap ïa ka jaka ba biang ban tei ïa ka jingkieng ba thymmai namar ka jaka ba mut ban tei mynshwa na kato ka jaka ba pyndonkam ki shipai kam bit satia namar ka Geological Survey of India (GSI) kala dep pynpaw shai kdar ba kam long ïoh ka ktah ïa kane ka jingkieng ba mynta lada jia ba hap shna bad hap pynbthei dynamite ïa ki maw ruh.