U Dr Mukul u dei ban pule bniah bha ïa ka MRSSA, ka kyntien Entry bad Exit kam don ha ka Aiñ : Dy CM

Shillong, Nailar 26 : U Symbud Myntri Rangbah ka jylla u bah Prestone Tynsong u la kyntu ïa u Nongïalam ka Liang Pyrshah u Dr Mukl Sangma ban pule bniah bha ïa ka Meghalaya Residents Safety and Security (Amendment) Bill 2020 kaba dang ïai ap haduh mynta ban ïoh jingpynskhem na u President ka ri India.
U la ong “ Kan jin da la bha ba u Dr Mukul un pule bniah bha ïa kane ka jingwanrah jingpynkylla ha kane ka kyndon aiñ kum uta u riewsaiñ pyrthei uba la ih bad ïaw bha bad uba la bit la biang ruh ka kyrdan khnang ba un sngewthuh bad lap ha ino i bynta ba don jingduna kane ka aiñ ba hap ban wanrah ka jingpynkylla. Ka daw ba hap ban wanrah ka jingpynkylla ka dei namar ïa ka kyntien Enty bad Exit ka don tang ha ka kyndon (rules) katba ym shym don ha ka Ain tynrai (Original Act)”.
U Symbud Myntri Rangbah u la kren kumne kum ka jingkawang nia ïa ka jingkynnoh u Dr Mukul ba ka sorkar MDA hapoh ka jingïalam ka NPP ka pyrshang ban pynduh pyndam wat ïaka MRSSA 2016 ruh. U Dr Mukul ula kynnoh ba kane ka sorkar ka la pynjot thiaw ïa kaei kaba la dep tei mynshwa ban ïada na ka jingwan tuid ki mynder.
Katba u bah Prestone ula ong ka aiñ ba la thaw mynshwa ka long beit tang ban peitngor ïa kita kiba wan sah wai ha ki shnong ki thaw hynrei ym don jingteh ïa kita ki mynder kumba la thmu ban thaw ïa kane ka aiñ.
Lah ban pynkynmaw ha ka 19 tarik Lber 2020 ka ïing Dorbar ka la mynjur ban wanrah ka jingpynkylla ïa ka MRSSA (Amendment) Bill 2020 khnang ba kan khlaiñ bor ban teh lakam ïa ka jingwan rung ki mynder sha ka jylla bad kumjuh ruh ban tip ruh haduh katno por kiwei ki jaidbynriew ki wan sahwai ha ka jylla.
Hynrei na ka liang u Lat ka jylla u Satya Pal Malik um shym la soi ïa ka Bill bad ul a phah pynban ïa ka sha u President ka ri India kaba dang sahkut sha Delhi haduh mynta.
Kumta na ka liang u bah Prestone u la ong ba ka jingkynnoh ba thmu ban pynduh pyndam kam long kaba dei, hynrei u Dr Mukul u dei ban pule bniah bin pa bin ïa kane ka aiñ.
“Hooid ha ki kyndon ( Rules) phi pynmih ïa ka kyntien Entri bad Exit hynrei ha ka Aiñ Tynrai (Original Act) pat kine ki kyntien kim don satia. Kumta kumba ka long hi i kumba ka dei tang ka Tanancy Act ne ka aiñ ban teh lakam ïa ki nongshong wai. “ Kumta kaei kaba ngi la leh ka long ba ngi wanrah ka jingpynkylla da kaba bsuh ïa kitei ki kyntien ha ka Aiñ Tynrai (Original Act) khnang ba kan skhem namar lada ka shu don tang haki kyndon kane ka aiñ kam long kaba khlaiñ tang shu la ujor ki briew sha ka ïing bishar la rem lypa”, pynkut u bah Prestone.