Shillong, Nailar 26 : Ka jingmaramot ïa ka surok bah naduh Rilbong Point ter ter sha Mylliem bad shaduh Dawki kan sdang noh naduh ka sngi Nyngkong ban wan, ïathuh u Myntri ka sorkar jylla Bah Hamlet Dohling.
Utei u Myntri u la ïathuh ruh ba hadien ka jingud jingnam jong ki nongleit nongwan khamtam eh ki nongshong shnong ka Mylliem constituency halor ka jingsniew palat ka surok mardor u la thoh sha ka NHIDCL.
“ïa kane ka jingmaramot ïa ka surok naduh Rilbong Point ter ter yn pyntrei da ka M/S Tanor Engineering, Itanagar, Arunachal Pradesh ha ka jinglut kaba 5.15 klur tyngka,” ong u Bah Hamlet Dohling da kaba bynrap ba mynta kane ka kompeni ka la pynpoi ïa ki tiar ki tar bad la kumno kumno naduh ka sngi Nyngkong kan sdang noh ïa ka kam.
Kane ka jingmaramot ka long ban pynsuk ïa ki paidbah kiba ïaid lyngba katei ka surok bah katba ka jingshna ïa ka surok fourlane kam pat dep.
Lah ban kdew hangne ba ka surok naduh Rilbong Point ter ter shaduh Upper Shillong ka ju mad ïa ka dheng kali kaba jur khamtam eh ha ka por mynstep bad por janmiet bad ka daw kaba kongsan kadei namar ka jingsniew palat ka surok ha shi lynter jong kane ka surok kaba la iehnoh da ki Kompeni kiba la ïoh ban pynheh ï akane ka surok.
