Nongpoh, Nailar 25: Ka Synjuk ki Rangbah Shnong, Ri-Bhoi District ryngkat bad ki nongïalam jong ki 4 tylli ki seng ba pawkhmat ka Ri-Bhoi naduh ka KSU, FKJGP, RBYF bad HNYF mynta ka sngi kila lum da ka jingïalang ban thaw da kawei ka kynhun naduh ki nongïalam sengbhalang bad ki nongïalam shnong kaba la tip kum ka Joint Action Committee Against Casinos ha Ri-Bhoi District naka bynta ban pyrshah ïaka ktem khalai (Casino) kaba la tei shaid shaid ha Ri-Bhoi District haka thaiñ Khanapara bad Jorabat.
Ha katei ka jingïalang la wan ruh ban shim bynta da ki nongïalam ka Synjuk naduh u Bah BB Makdoh Chairman, Bah PB Sylliang Secretary, ki nongïalam sengbhalang ba kynthup ïa u Bah Ferdinald Kharkamni President ka KSU, Bah Luistar Lyngdoh President ka FKJGP, Bah Marcus Marten President ka HNYF bad kiwei kiwei lem bad ki nongïalam shnong.
Haba kren sha ki lad pathai khubor u Samla Ferdinald Kharkamni, u la ong ba hadien ka jingïatai sani bha halor ka jingwanrah ïaka ktem khalai ha Ri-Bhoi kitei ki riew rangbah kila sngewdei ban thaw noh da kawei ka kynhun hapoh kawei ka shatri naduh ki nongïalam shnong bad ki sengbhalang ban pynpaw ka juh ka sur ban pyrshah ïa katei ka Casino kaba la tei shaid shaid ha Ri-Bhoi District, kaba bun naki paidbah ki pyrshah bad da kawei ka jingkut la rai ruh ban thaw da kawei ka kynhun kaba la tip kum ka Joint Action Committee Against Casinos bala thung ruh ïa u Bah BB Makdoh kum u Chairman bad u Samla Ferdinald Kharkamni kum u Secretary katei ka JAC haka jingdonlang kiwei kiwei ki nongïalam, sengbhalang bad ki rangbah shnong kum ki nongkitkam bad ki dkhot.
U la ong ruh ba kum ka kynhun baroh kawei hapoh ka shatri jong ka Joint Action Committee against Casinos, kila pynpaw ka jingsngewkhia halor ka jingmut jong ka sorkar ban pynlong ïaka Ri-Bhoi kum ka ktem khalai haka jaka ban wanrah da kiwei ki jingmut ban kyntiew ïaki khun samla kum ki jaka pule ba bei tyngka da ka sorkar (Government College), ki medical college, ki jaka hikai ban lam sha ka jingbha ïakito ki khun samla kiba la ngop bad kyrni haki jingdih buaid, ki jaka ai jinghikai halor ki kam bapher bapher ki ban kyntiew ïaki khun samla haka dong Ri-Bhoi kaba la kiew shaphrang haki kam pynroi bad kaba la ioh nam ruh kum ka Aspirational District.
Hynrei sngewsih ban tip ba ka sorkar jylla kala wanrah pynban da ki ktem khalai haka thaiñ Khanapara bad Jorabat bad khlem pep lada yn pyntreikam ïa katei ka ktem khalai, ki jingsniew ba bun kin sa roi haka jylla kum ka jingdie bad khaii met, ki jingdih buaid bad kiwei kiwei kiba ktah ïaki khun ki kti bad ka lawei jong ki khun samla haka jaka ban btin ïaki haka lynti kaba dei, la ong u Samla Ferdinald.
Namarkata naka liang ka JAC kala shim ruh ka rai ban pyrshah beit ïa ka jingthmu jong ka sorkar ban plie bad ban pynlong ïaka Ri-Bhoi District kum ka ktem khalai namar ki don shibun kiwei pat ki lad ki lynti ban pynmih pisa naka bynta ka khajna sha ka sorkar jylla, u la bynrap.
