Nongpoh, Nailar 25 : Ki nongïalam ka seng Hynñiewtrep Integrated Territorial Organisation (HITO), Ri-Bhoi District mynta ka sngi kila mih shakhmat ban pynpaw kawei ka sur ban pyrshah jur beit ïaka ktem khalai (Casino) kaba la ieng ban tei shaid shaid ha Ri-Bhoi wat hapdeng ka jingpyrshah kiba bun.
Haba kren sha ki lad pathai khubor mynta ka sngi, ki nongïalam ka HITO Ri-Bhoi naduh u Bah Ban Kharnaior President, Bah Kenny Nongrum Secretary, Bah Apbor Nongrum Vice President bad kiwei kiwei ki dkhot, kila pynpaw ba kum ka seng kan ieng pyrshah beit ïa katei ka ktem khalai ha Ri-Bhoi District kaba la thmu ban pynieng ha Jorabat.
Ki la pynpaw ruh ba kum ka seng kala dep ruh ban ai jingthoh bad leit kynduh ïaki MLA ka Ri-Bhoi ban pynpaw ka jingpyrshah ha kaba ki ruh da ka juh ka sur kila ieng ban pyrshah ïa katei ka ktem khalai ha Ri-Bhoi.
Na ka liang ka seng kala ther tyngeh ruh ïaka sorkar jylla ba haka jaka ban wanrah da ki jaka pule, ki medical college bad kiwei kiwei kiba ai jingmyntoi bad kyntiew ïaki khun samla pynban la wanrah da katei ka ktem khalai kaba wanrah ki jingsniew bad kiwei kiwei ki kam sniew haka imlang ka sahlang.
Ki la ong ruh ba kum ka seng kan nym aili ba katei ka ktem khalai kan ieng ha Ri-Bhoi bad naka liang ka seng kan pynlong wat da ki jingïakhih ba tyngeh lada ka sorkar ka kuman ïaka jingkyrpad bad ka jingsngew jong ki paidbah ka them Ri-Bhoi, kila bynrap.
