Shillong, Nailar 22 : Ka ïing bishar High Court jongka jylla mynta ka Lah Sngi U Blei ka la pynmih ïa ka hukum ban bthah ïa ka sorkar pdeng ba kan phai khmat sha ka rukom shna ïa ki surok sha kane ka thaiñ shatei lam mihgi namar kine ki jylla ki long kiba dap da ki lum ki wah bad ka kham eh bha ban shna ïa ki surok ruh ym kum sha kiwei ki jaka.
“ La kyrmen ba ka sorkar pdeng kan phai khmat sha ki jingdonkam jong ki jylla kane ka thaiñ kiba long lum kumta hap ban shna ïa ki surok ba bha ban suk ki paidbah ha ka leit ka wan bad lait ruh na ki jingkhap ngiah bad dheng kali” ong ka ïing bishar haba bishar ïaka mukotduma PIL.
ïa kane ka mukotduma PIL la ujor da u Arnold G Momin. Ha ka jingbishar na ka liang ka sorkar jylla ka la pan por ba kan ïoh ïakren bad ka sorkar pdeng ne bad ka tnad ba peit ïa ki surok na ka bynta ban pyllait pisa sha ka jylla ban ïoh pynbha ïaki surok. Kumta halor kane ka jingpan por na ka liang ka ïing bishar kala buh ban bishar biang ïa kane ka mukotduma ha ka 14 tarik Nailur 2022.
