Pynrem ka TUR ba pyllait phatok ka sorkar Gujarat ïa 11 ngut ki runar ba donkti ha kaba leh beijot ïa ka Bilkis Bano

Shillong, Nailar : Ka kynhun Thma U Rangli-Juki (TUR) ryngkat bad kiwei de ki nongshong shnong ka Jylla Meghalaya ki pynpaw ka jingbitar bad pynrem jur ïa ka Sorkar Gujarat kaba la rai ban pynlait phatok ïa ki 11 ngut ki runar kiba donkti ha kaba leh be ijot ïa ka Bilkis Bano.
“Ngi ïa-ïeng ryngkat bad kyrshan ïa ka Bilkis Bano ha ka jingïakhun kaba 20 snem jong ka ban ïoh ia ka bishar hok bad ngi ñiewburom ïa ka jingshlur jong ka. Ngi dawa jur ba ka Sorkar India ka dei ban pyndam shi syndon ïa kane ka rai jong ka Sorkar Jylla Gujarat. Ka jingrai bad jingleh jong ka Sorkar Gujarat kam long kaba shong aiñ, ka buh ïa ka imlang sahlang ha ka jingsniew kaba shyrkhei tam bad ka long ruh ka jingñiew bieñ ïa ki aiñ bad jingbishar kiba shong hok. Kumta ngi khot ïa baroh ki nongshong shnong jong ka Jylla Meghalaya ban dawa ban pyndam noh ïa ka rai jong ka Sorkar Gujarat bad ngi la pynkhreh ïa ka shithi ban ujor sha ka President ka Ri India bad buh ïa ka jingdawa hakhmat jong ka kum ka khliehduh jong ka Ri. Kane ka shithi ngi buh hakhmat ka rynsan paidbah bad ngi khot lang ïa phi ban soi bad mynjur lang ïa ka shithi jingdawa bad phi lah ban phone sha une u number 9863097754 ban ïashim bynta lang, ong ka nongïalam ka TUR, ka Kong Angela Rangad.
“Ngi pynrem jur ruh ïa ka jingleh kmen leh tamasa kaba la paw ha ka sngi ba la pynlait ïa kitei ki 11 ngut ki runar bad ki nongshoh noh briew. Ka jingpdiang burom bad ki jingpynksan paidbah ïa ki 11 ngut ki rang batbor kynthei kum ki briew kiba lui lui ne kiba bha ne kiba khuid namar ba ki dei ki “brahmin” ka dei ka jingñiewpoh ïa ki kynthei kiba mad ïa ka jingshah leh beiñ bad jingshah leh be ijot. Ka dei ruh ka jingleh ibeiñ ïa ka Bilkis Bano. Ngim dei satia ban pdiang ïa kane bad ngi dei ban pynkynmaw ïalade ba ka Sorkar MDA ha Meghalaya ruh ka kynthup ïa ka seng saiñ hima kaba synshar ha Gujarat bad kaba dei ka Sorkar kaba rai ban pynlait ïa ki rang batbor kynthei,” ong u kyrwoh.
Na ka liang ka TUR bad ki nongshong shnong ka jylla ki dawa ruh ba ka Sorkar Meghalaya ka dei ban pynrem jur ïa ka jingleh ibeiñ jong ka Sorkar Gujarat ïa ki ritpaid bad ïa ki kynthei kaba long ruh pyrshah ïa ka aiñ briew ka aiñ Blei.La dawa ruh ba u Myntri Rangbahduh (PM) ka Ri u dei ban bat ïa ka burom ka ijot jong ka Ri bad u dei ban pyni ba ka Ri India ka dang dei hi ka Ri kaba laitluid bad kaba burom ïa ki hok jong ki kynthei bad ki nongshong shnong bad ba ka Ri ka dang ïeng ha ka nongrim jong ka hok bad ka jingshisha.
“Ha ka jingrakhe ïa ka jingdap 75 snem ka Jinglaitluid ka Ri, ka Jylla Meghalaya ryngkat lang bad kiwei ki Jylla , ka la rakhe da ka jingshitrhem bad ki kyntien jali jaum ki la mih na ki jingkren ki nongsynshar ba ka Ri India ka long kaba khraw, kaba shngaiñ bad ka la nangkiew shaphrang. Haba kren na ka rynsan jong ka Rampart ha Nongbah Delhi, u PM ka Ri u la kren leh mynleh kum ban jaw ummat bad u la kren shaphang ki hok, ki iktiar jong ki kynthei bad ka Nari Shakti. Katba ka Sorkar Jylla Gujarat pat ka la shim ïa ka rai kaba sniew bad ba shyrkhei tam ban pynlait na phatok ïa ki 11 ngut ki rang batbor kiba la shah pynrem ha ka ïing Bishar namar ba ki ïa don kti ha kaba leh beijot bad pynïap briew ha ka jingbishar halor ka mukutduma jong ka Bilkis Bano,” ong u kyrwoh.
Arphew snem mynshuwa kine ki 11 ngut ki rang ki la pynïap 14 ngut ki dkhot jong ka ïing jong ka Bilkis Bano hadien ba ki la batbor bad leh beijot ïa ki kynthei kaba kynthup ïa ka Bilkis Bano kaba dang armet san bnai ha katei ka por. Napdeng kiba shah pynïap dusmon, ka Bilkis Bano ka la lait im bad da ka jingngeit ha ka jingbishar hok ba ka kyrmen ban ïoh na ka ïing Bishar ka Bilkis Bano ka la ïakhun tat haduh ba ki nongpynïap briew bad ki nongleh beijot kin shah pynrem.
“Ngi ïeng ryngkat bad ki kynthei, ki kynhun jong ki kynthei ha kylleng ka Ri India ban pynpaw ba ka jingrai jong ka Sorkar Gujarat ban pynlait ïa ki 11 ngut ki rang kiba leh beijot ïa ka Bilkis Bano kan ktah ïa kiwei de ki kynthei kiba ngat ha kane kajuh ka apot bad kiba mynta ki dang ïaksaid ban ïoh ïa ka jingbishar hok. Ka rai jong ka Sorkar Gujarat ka long pyrshah ïa ki nongrim bad ka Sorkar Gujarat ka la pynkheiñ ïa ki kyndon jingbthah jong ka Sorkar Pdeng sha ki Sorkar Jylla ha kaba ïadei bad ka jingpynlait ïa ki koidi. Ka jingbthah ka kren shai ba lah ban shim pyrkhat bad rai ban pynlait ïa ki koidi ha ka jingrakhe ïa ka ‘Azadi ka Amrit Mahotsav,’ lait noh tang kito kiba la shah rai pynrem ha ki kam leh beijot. Shuh shuh, kino kino ki jingmudui kiba tohkit bad mudui da ka CBI, ki Sorkar Jylla kim lah ban shim ka rai ban pynduna ïa ka jingpynsaja ïa ki nongleh kam sniew khlem da ïoh ka jingmynjur na ka Sorkar Pdeng. Kane ka jingleh jong ka Sorkar Gujarat ka ñiewthala bad pynpaw shai ba kane ka Sorkar India kaba mynta kam don jingkitkhlieh na ka bynta ki kynthei bad ki jingpyrta kum Nari Shakti, Beti Bachao bad ki hok jong ki kynthei ki long tang ha lyer. Hato ka Sorkar Gujarat ka lah ban leh katba ka sngewbit marwei?”Pynkut u kyrwoh na TUR.