30 lak shna kamra shetja ka KHADC ha Traditional and Cultural Centre, Jingkieng Kalong

Shillong, Lber, 27: Ka Hynñiewtrep National Youth Front (HNYF) East Khasi Hills District Unit ka la pynpaw ba kam hun bad kam lah satia ban pdiang daleilei ruh em ïa ka jingpynshai jong u Executive Member i/c Building ka Khasi Hills Autonomous Districit Council (KHADC) u Bah Teiborlang Pathaw halor ka jingkynnoh jong ka Seng katkum ka jubab RTI hadien ka jingleit sorjamin ïa ka jingshna ïa ka Traditional and Cultural Centre ha Jingkieng Kalong dang shen.
Ha ka jingïakren bad ki lad pathai khubor u President jong ka HNYF-East Khasi Hills District Unit u Bah Blessed Son Dkhar u la ong, “ngi kwah ban kren da kaba shai ba ka pisa kaba T.12 klur ba ka KHADC ka la pynlut ban shna ïa ka Traditional Centre, ha Jingkieng Kalong bad ïa ka jinglap jingshem jong ngi hadien ba ngi la ïoh pdiang ïa ka jubab RTI.”
“Mynta ban shu ong, ba la pynlut katta katta klur kumno ngin ngeit, ngi hap ban leit peit, ngi hap ban leit khmih kumno kata ka pisa T. 12 klur (ba ka KHADC ka la mang) ka ïahap neem bad ka jingpynlut ha ka Jingkieng Kalong,” ong une u nongïalam ka Seng.
“Ngi khlem kynnoh ïano ïano ruh bad ngi khlem pyrshah ïano ïano ruh. Ngi kren halor ka jubab RTI kaba ngi la ïoh pdiang. Ngi khlem kren shabar khlem ka jingtip. Kata ka dei ka jubab kaba ngi kwah ban ai sha ka KHADC bad sha u EM i/c Building. Ngi khlem kawang ktieh ïano ïano ruh em. Ngi kren ïa ki jingshisha,” la pynksan u Bah Dkhar bad bynrap, “ka pisa kaba T. 12 klur kam dei ka jong nga, kam dei ka jong u MDC, ka dei ba la ai da ka Sorkar India sha ka KHADC ban myntoi u paidbah.
Haba kynnoh ba ka rukom siew pisa jong ka Council sha u Kontraktor ka long ka bym lah satia ban pdiang, u Bah Dkhar u la ong, “phi ju lap hangno ba u Kontraktor haba u pyntrei ïa kano kano jingtrei ha kano kano ka tnat treikam tang hapoh ka shibnai u la lah ban sei pisa T. 50 lak, hapoh ka shi bnai sa T. 2klur, sa 1 klur. Ka seng hi kam lah ban pdiang da leilei ïa kane. Na ka T. 12 klur, haduh 70 percent ïa ka pisa ladep sei. Hynrei ladep peit ïa ka kam hang thie (ha Jingkieng Kalong) kam poi shano shano ruh bad nalor kata, ka jingmang pisa haduh T. 3 klur tang ïa ka surok ha Jingkieng Kalong kam ihap satia.”
U la ong shuh shuh, “katkum ka jubab RTI la pyni ba u Kontraktor u la sei pisa T. 7 lak ha ka 30 tarik, Jymmang, T.6 lak ha ka 20 tarik, Jylliew, bad T.1.30 klur ha ka 30 tarik Nailar, 2018. Mano ba ai jingbit ïa u?”
“Nga kwah ban buh jingkylli ïa u EM mynno ka surok ha Jingkieng Kalong ka la ju twa. Da ki spah sien ngi la poi sha Lynti rim ngim ju bna ba ka don ka jingtwa khyndew wat ha ka por lyiur ruh. Ngi shu ïohi hadien ba la jurip bad ngi lap tang ïa kawei ka kynroh kaba ki (KHADC) tei ha Wah Jri na ka pisa kaba la mang T. 3 klur,” u la ong.
“Kato ka kynroh la kumno kumno (lada shna pynbha) kaba rit eh kan poi tang T. 15 lak. Ka surok ba shu tap maw, kaba siang khyndew bad siang rong kan poi haduh 3 klur? Ki nong Mawdun kin bishar hato kane ka surok ba la trei da u Rodeka Enterprise ka biang neem.? la buh jingkylli ka Seng.
Shuh shuh u la ong ba ka KHADC ka la ai ruh ïa ki jubab ha ka RTI ïa kiba ka Seng ka khlem pan da kaba pyni ba ïa ka pisa la pynlut ban shna sa ïa ki iew jong ka Council.
U la kam ruh ba ka Seng kam lah satia ban pdiang daleilei ruh em ba ïa ka kamra shetja ha Guest House ban sah ki MDC ha ka Traditional and Cultural Centre yn pynlut haduh T.30 lak.
“Ïa kine ki jubab ha ka RTI kiba ka KHADC ka la ai hi khlem da pan, ngin sa leit jurip namarba la pyni ba la pynlut haduh T.1 klur ban shna ïa ka Iew bad ban maramot ïa ka ophis jong ka KHADC da ki klur tyngka. Ïa kine ki jubab ba la shu ai hi da ka KHADC ngin sa leit jurip, ngin ym shah daleilei ruh em ban pyndonkam bakla,” u la ong.