12 snem tam sahteng ka jingshna ïa ka Sub-Health Centre ha Mawkhyrwang

Mawkyrwat, Nailar, 18: Ki paidbah nongshong shnong kiba hap hapoh jong ka thaiñ Mawkhyrwang, mynta lah da ki snem ki la ap ïai ap dngong dngong ba ïa ka Sub Center kaba kawei na u bud lum jong kakoit ka khiah ba khampajih na ki PHC’s ne ki CHC’s ban peit na ka bynta ka pang ka shitom namar kathaduh mynta ym pat shym la lah ban leh ei ei ne pyndep ïa ka jingtei.
Ha kaba ïa dei bad kane ka kam sahteng ba la don mynta lah da ki 12 ne 13 snem ei ei bad ka la long ka jingduhnong kaba khraw na ka bynta ki paidbah kiba donkam ki jingïarap ha ka liang ka koit ka khiah namar lada ki don hapdeng ki jingshitom bad malu mala ruh ki la hap ban wan beh haduh Mawkyrwat CHC. Nalorkata, ki la hap ban ïaid ïa ka lynti kaba jngai kumba 3 kynta ei ei da ka kjat bad kathaduh ban poi sha jaka sumar lei lei lada don lei lei kiba pang kham jur don ki bym poi shuh ha ki jaka sumar namar ba ki khlad noh ha shiteng lynti, ïa kane la ïoh lum jingtip na ki paidbah nongshong shnong.
Kumta na ka liang jong ki nongïalam shnong jong ki 6 shnong kiba kane ka Sub Center ka kdup, ki la buh ka jingkyrpad ïa ka sorkar lyngba ka tnad kakoit kakhiah bad khamtam eh ïa u nongmihkhmat ba wat shongshit ban kren tang ha ki por shwa ka elekshon ban leh ei ei na ka bynta ki paidbah hynrei ïa ka kular ba la khlei dei ban pynurlong namar ka don ka ktien kaba ong, “ka kam ka kren khamjam ban ïa ka ktien hynrei ha ki politician pat ka ktien ka kham kren jam ban ïa ka kam”. Namarkata, lada long kaba lah sngewbha ban pyndep noh khamkloi namar ka la donkam kyrkieh bad khnang ba kiba pang ba shitom kin ïoh ka jingmyntoi ha kaba ïa dei bad kakoit kakhiah. Ha kajuh ka por ki kyrpad ruh ba ynda la dep ïa ka jingpyntrei ruh sngewbha ban buh ruh ki nongtrei kiba pura da kaba ai kam ha kito ki briew kiba lah ban trei, ym ha ki bym lah ban trei.
“Ah! sa katno ngin hap ban ap ïa kane ka jingtei ba kan urlong kumba ki paidbah nongshong shnong ki la ap khmih lynti lah slem bah?” ha kajuh ka por balei kita ki nongmihkhmat kim ju bud-dien bad peit pyrman ïa ki kam ba la prat lynti da ki nongmihkhmat kiba rim? Hato kam long seh kaba dei ban bud-dien ïa ki kam ne hap ban tei da kiwei kaba thymmai? buh jingkylli ki paidbah.
Lah ban pynkynmaw ruh hangne ba da ka jingbymdon ïa ki jaka sumar kiba hajan, bunsien haba pynkit ïa kiba pang kam long kaba suk namar kathaduh mynta ka surok kali ruh kam pat don bad bunsien haba ban pynkit da ka bor met u briew bad lada don lei lei kiba ka jingpang ka kham jur tang ha shiteng lynti ruh kim da poi hynrei ki la shu duh ei noh ïa la ka jong ka jingim.
Lada pyntreikam ïa kane ka Sub Centre kaba don hapoh Shnong Mawkhyr-wang ka dei kawei na ki Sub Center ka ban peit, kdup ne ai jingmyntoi na ka bynta ki 6 tylli ki shnong kata ka shnong Mawtangden, Nongnam, Mawkhyrwang, Mawbri, Mawsaiñ bad Lum Pyngngad.