Jowai, Nailar 17: Kumba ju long manla u snem ka Behdeiñkhlam jong ka Raij Mukhla kan long ha ka 23.08.2022, ha Biar (Aitnar) kaba don ha Mukhla Nongrim naduh ka por 1.00 nohphai sngi.
Hadien ar snem ba ki paidbah kim ïoh shuh ban ïa shim bynta na ka daw jong ka khlam COVID-19, hynrei mynta u snem pat ki la ïoh ban ïashim bynta laitluid kumba ju long ha ki snem ba mynshwa.
Kumta na ka liang jong ka Seiñ Raij Mukhla ka khot bad wer sngewbha ïa ki paidbah ban ïa wan sakhilang ha kane ka sngi. Ha kane ka Behdeinkhlam jong ka Raij Mukhla yn wan sakhi lang da u Myntri Rangbah jong ka jylla u Conrad K. Sangma bad kiwei de ki kynrem ki lyndan ba shah khot sngewbha. Kane ka long katkum ka khubor ba la pyllait da u General Secretary ka Seiñ Raij Mukhla ma T. Sumer.
