Shillong, Nailar 13: Ka seng HNLC ha ka sngi Saitjaiñ ka la phah ïa u syntiew sha u lum jyntep u nongïalam barim jong ka u Bah Cheristerfield.
Ïa une u syntiew jong ka HNLC la pynpoi da ka seng HNYF ha u Lum Jyntep ha Lawmali. Kum ban shu kdew hangne dei u Bah Sadon Blah u la long u nongmih khmat na ka bynta ka HNLC ha ka jingïakren ïasuk bad ka sorkar jylla bad kumjuh bad ka sorkar India.
Haba kren lyngkot ïa ka khana jingim bad jingïaid lynti jong u Bah Cherishterfield u para jong u, u Bah Granary Starfield Thangkhiew u la ïathuh ba u hymmen jong u, u la leit ban pynïasnoh bad ka kynhun seng lehnoh (underground) ha u snem 1987 mynba ka jingïakhih beh Nepalee ka thnem bha bad ha kata ka por u dang don dang kumba 17 snem ka rta.
“Ha ka por ba u hymmen jong nga u leit pynïasoh u dang don dang 17 snem ka rta bad u leit pynïasoh ruh ym ha ki kyrdan ba heh hynrei tang kum u nongtrei barit eh ka bad dei ynda ki nongïalam ba ha khmat ki la ieh khunswet ïa ka seng ba ka jingkit ba khia kum u nongïalam ka hap ha ka tyrpeng jong u tad haduh ba un wan pahi biang sha ka imlang sahang ha ka 18 tarik Risaw 2018” ïathuh u bah Granary.
Shuh shuh u Bah Granary u la khot la wer ruh ïa ki seng bhalang baroh ba kin ïa tylli na bynta ban ïakhun ïa kiba bun ki daw kiba ka jaidbynriew da kaba klet noh ïa ki jingïapher kiba don. U Bah Granary Starfield u la ai khublei kyrpang eh ïa baroh kiba la leh bha ïa u bah Cherishterfield mynba u dang don ha ka seng HNLC kiba la ju ai bam bad jaka rieh ha ki por ba u donkam.
Ha kane ka sngi na ka liang u Bah Granary u la pynlait paidbah ruh ïa ka sticker kaba don ka dur bad ki jingthoh shaphang u Bah Cheristerfield bad ka jingpynher ïa ki balloon ïong ha Mawlai Standbus ba la pynkhreh da ka Sur Ka Bri U Hynñiewtrep kum ban pynrem ïa ka jingbym pynlait paidbah shuh ïa ka kaophod wat hadien ba ka kynhun tohkit ka la aiti ha ka sorkar.
Ha kane ka sngi la sakhi ruh ba da ki bun bun spah ngut ki paidbah na kylleng ki bynta ka Bri U Hynñtrep kiba wan kynmaw burom ïa une u nongïalam barim ka HNLC.
Kumban shu pynkynmaw hangne ba u bah Cheristerfield u la khlad noh na kane ka sla pyrthei ha ka step phyrngap jong 13 tarik nailur 2021 namar ka jingshah siat ïap ha ki pulit ha iing sah jong u ha Mawlai Kyntonmasar
