Hukum u DC ka Ri Bhoi ban khang ïa ki dukan kyiad ha ka 15 tarik

Nongpoh, Nailar 12: U Deputy Commissioner ka Ri Bhoi, u Arpit Upadhyay u la pynmih syndon da ka hukum ban bthah baroh ki dukan kyiad ki bar bad kiwei kiwei ki jaka shna kyiad ha Ri Bhoi ki dei ba khang khyrdep ha ka 15 tarik u Nailar 2022, kaba dei ka sngi rakhe ïa ka sngi laitluid ba 75 snem ka ri India.
Kane ka jingpynmih hukum u Deputy Commissioner ka Ri Bhoi ba khang ïa ki jaka shna ne die kyiad ha Ri Bhoi ka dei halor ka jingdon ka jingrakhe ïa ka sngi Laitluid ka Ri India bad kum ka bor synshar District ka peitngor ban nym mih kino kino ki huri hura kiba ktah pat ïa ka jinglehkmen bad rakhe ïa kane ka snig Laitluid ka ri India.
Kino kino kiba ïaleh pyrshah ïa kane ka hukum ba la pynbna da u Deputy Commissioner ka Ri Bhoi kin ngat ha ka jingpynshitom kiba dei katkum ki kyndon aiñ ba la pynjari da u Deputy Commissioner kaba ïa dei ba ka jingmana ban plie ne die ïa ka kyaid ha katei ka sngi khraw ba ka ri ka rakhe ïa kajingdap 75 snem naduh ba la ioh la ka jong ka jinglaitluid na ka jingsynshar donbor ki Dohlieh.