Nongstoiñ, Nailar, 11: Ki Pulit ka Nongstoiñ Police Station hynne ka step sngi palei, ki la ïoh tam ïa ka met ïap I khunlung kynthei ba dang hynriew bnai ei ei na kpoh ka kmie, ha kaba la lap narud jong ka wah Nondeiñ, Nongstoiñ.
Katkum ka khubor na ki pulit, la ong ba kawei ka longkmie ba sah marjan ha katei ka jaka kaba mar syndah bad ka D.I Ophis bad Meghalaya Rural Bank Nondeiñ, ka la sma iwtung ha katei ka jaka la kumba lai ne saw sngi ei ei. Kumta hynne ka step ha ka por kumba 9:30 ei ei ka la leit ban jngoh ïa kawei ka song plastic rong iong, kaba ka nang mut ba don ba song ïa ka met ïap jong u ksew sa wan bret ha katei ka jaka.
Hynrei, haba ka la plied ïa katei ka plastic ka la lap pynban ïa ka met ïap jong I khunlung kynthei. Kumta mar mar la pyntip sha ki bor shnong bad hadien pat la wan ban shimti noh da ki pulit. Na ka liang ki pulit ki la register case halor kane ka jingjia bad ka jingtohkit ka la ïaid sha khmat ban lap ïa ka kmie jong I ne I khunlung.
