Shillong, Nailar, 10: Ka Samla Nizagiri Syiemlieh, 19 snem ka rta kaba dang pule ïa ka Bachelor of Science (BSc) 5th Semester ha St. Mary’s College, Shillong ka la jah naduh ka 6 tarik mynta u bnai.
Kane ka samla ka dei ka khun kynthei jong ka Kong Pynshailang Syiemlieh bad u Bah Emerald Langstieh kiba shong basah ah ka shnong Laitjem, Upper Shillong, East Khasi Hills District.
Hadien ba kane ka samla kam shym la wan phai satia wat haduh ka sngi u Blei, ka 7 tarik mynta u bnai, ka kmie jong kane ka samla lem bad ki bahaing hasem kiba leit pyntip noh sha ki Pulit jong ka Laitumkhrah Police Station, Shillong khnang ba ki Pulit kin dup pynlong ïa ka jingtohkit kaba bniah ban lap dien biang ïa kane ka samla.
Ka kmie jong kane ka samla ka Kong Pynshailang Syiemlieh ka la kyrpad ïa la ka khun ba kan wan phai biang sha la iing naba ki bahaing hasem bad ki para ki ap khmihlynti ïa ka jingwan phai biang jong ka sha la ing.
Ka kmie ka la kyrpad ruh ba lada don mano mano kiba ïohi ne lap ïa kane ka samla ba kin pyntip sha ki bahahaing hasem lyngba u nombar 9856293606
Ki Pulit ka East Khasi Hills District ha u kyrwoh ba la phah sha ki lad pathai khubor ki la pyntip ba kane ka samla ka don ïa ka rynïeng kaba jrong 5 phut, kaba shai sniehdoh, ka durkhmat ba pyllun bad ka phong da ka sopti rong jyrngam bad stem bad ka patlun.
Ki Pulit ki la kyrpad lada don kino kino kiba ïohi ki lah ban pyntip lyngba u nombar phone jong ka Police Control Room 0364:222214, Police Station Laitumkhrah PS: 0364:2223069 bad SPs Office Crime Branch (i/c Missing Desk) 8837282114.
